«Sınıı kıt» oıynynyń avtory sottaldy

Foto: Novosıbırsk sot basqarmasy

Reseıdegi Novosıbırsk sot basqarmasynda «Sınıı kıt» arnasynyń avtory Ilıa Pogıbalovqa úkim shyǵaryldy. Ol 9 jylǵa bas bostandyǵynan aıyryldy, dep jazdy qandastar.kz

Pogıbalovqa óz-ózine qol jumsaýǵa ıtermeleýge baǵyttalǵan áreketti uıymdastyrý, ınternettegi top arqyly kámeletke tolmaǵandardy óz-ózine qol jumsaýǵa ıtermeleý jáne kámeletke tolmaǵandy qylmys jasaýǵa tartý baptary boıynsha aıyp taǵylǵan.

2023 jyly Pogıbalov basqa adamdardyń ólimine degen patologııalyq qyzyǵýshylyǵynyń nátıjesinde «Sınıı kıt» arnasyn qurǵan. Ol arnasynyń jazylýshylaryn «óz-ózine qol jumsaýǵa daıyndaý úshin arnaıy tapsyrmalar oryndaýǵa» ıtermelegen. Aıyptaýǵa sáıkes, Pogıbalov óz qurbandaryn sýııdke deıin jetkizýdi maqsat etken.

Pogıbalov 9 jylǵa bas bostandyǵynan aıyryldy. Oǵan qosa tórt jyl boıy kez kelgen ınternet-resýrsty basqarýyna tyıym salyndy.

«Sınıı kıt» —jasóspirimderge tapsyrma berý arqyly óz-ózine qol jumsaýǵa aparatyn oıyn. Bul tapsyrmalar jalǵan atpen tirkelgen kýratorlar arqyly berilgen.