«ءسىز اجىراستىردىڭىز دەيدى»: قايرات نۇرتاستىڭ ەكس-ديرەكتورى بار شىندىقتى ايتىپ بەردى

فوتو: سكرينشوت

قايرات نۇرتاسپەن 16 جىل بىرگە جۇمىس ىستەگەن ميرا كەلىمبەتوۆا وزىنە قاتىستى قاۋەسەتكە نۇكتە قويدى. قازاق ەستراداسىندا ويىپ ورىن العان ءانشىنىڭ بۇرىنعى ديرەكتورى ايداربەكوۆتەر اۋلەتىنە العىسىن ءبىلدىرىپ, نە سەبەپتى جۇمىسىن توقتاتقانىن ءتۇسىندىردى, دەپ جازادى KAZ.NUR.KZ.

ميرا كەلىمبەتوۆا ءوز مانسابىنا قاتىستى YouTube جەلىسىندە اسميرا ەرمەكقىزىنا بەرگەن سۇقباتىندا بايانداپ بەردى. ول اڭگىمە بارىسىندا جۇمىستان كەتۋىنە جەكە ءومىرى سەبەپ بولعانىن العا تارتتى.

«جەكە ومىرىمدە ءبىر جاعداي بولدى, مەن ونى ايتا المايمىن. قازىر سول جاعدايعا راقمەت دەيمىن, ويتكەنى مەنى وياتقان سول. ومىرىمدە سونداي جاعداي بولىپ جاتقان سوڭ قايراتپەن جۇمىستى توقتاتامىن دەگەن شەشىم شىعارىپ, ءوزىم كەتتىم. ول جەردە اقشانىڭ ەش قاتىسى جوق. ءوزىمدى تانىعىم كەلدى, وزىممەن اينالىسقىم كەلدى.

«مۇنداي جاعداي ومىرىمدە بەكەردەن-بەكەر بولعان جوق. قۇداي ماعان بىرنارسە تۇسىندىرگىسى, ۇيرەتكىسى كەلىپ تۇر. مەن سونى ءتۇسىنۋىم كەرەك, ءبىلۋىم كەرەك» دەگەن شەشىم شىعاردىم. ەشكىمنىڭ ەشقانداي كىناسى جوق», — دەدى ول.

وسى تۇستا ميرا كەلىمبەتوۆا ايداربەكوۆتەر اۋلەتىنە العىس ايتۋدى ۇمىتقان جوق.

«ول كىسىلەرگە شىن جۇرەگىممەن العىسىمدى ايتامىن. قايراتقا دا, گۇلەكەڭە دە, نۇرەكەڭە دە, بارىنە العىس. ءومىرىمنىڭ جاڭا دەڭگەيگە شىعۋى ءۇشىن سول ورتادا, سول وتباسىندا, شوۋ-بيزنەس سالاسىندا جۇرگەنىمە راقمەت ايتامىن. قايرات ماعان راقمەت ايتتى. ول ءالى كۇنگە دەيىن «قالىڭ قالاي? ءبارى دۇرىس پا?» دەپ جازىپ تۇرادى. باۋىر سياقتى بولىپ كەتكەنبىز. مەن وعان دوس رەتىندە, زامانداس رەتىندە ءاردايىم تىلەكشىمىن», — دەدى ول.

ءانشىنىڭ ەكس-ديرەكتورى وزىنە قايرات نۇرتاستىڭ جەكە ومىرىنە قاتىستى حاتتار كەلەتىنىن دە جاسىرمادى.

«جۇرت نەشە ءتۇرلىنى ويلاپ تابادى. ماعان «زاڭعار مەن جىبەكتى اجىراستىرعان ءسىز ەكەنسىز», «قايرات پەن جۇلدىزدى ءسىز اجىراستىرىپسىز» دەپ جازعان. مەن بىرەۋ مەن بىرەۋدى اجىراستىراتىن قۇدايمىن با?», — دەدى ول.

قازىر ميرا كەلىمبەتوۆا شوۋ-بيزنەستەن الشاقتاپ, باسقا سالاعا بەت بۇرعان.