ءسىز ورىسشا اكتسەنتپەن سويلەيسىز, قازاقستاندى ۇياتقا قالدىراسىز: «بولاشاققا» قۇجات تاپسىرعان جىگىت جاعدايدى باياندادى

فوتو:ertenmedia.kz

الەۋمەتتىك جەلىدە دارىگەر جاسۇلان تەمىربايدىڭ «بولاشاق» باعدارلاماسىنا قاتىستى جازباسى قىزۋ تالقىلانۋدا. ونىڭ ايتۋىنشا, سۇحبات بارىسىندا كوميسسيا مۇشەلەرىنىڭ ءبىرى «ءسىز (ورىسشا) اكتسەنتپەن سويلەيسىز, قازاقستاندى ۇياتقا قالدىراسىز» دەپ مالىمدەگەن. كەلەڭسىز جايتتىڭ نەدەن باستالىپ, قالاي وربىگەنىن جاسۇلان تەمىرباي ErtenMedia.kz تىلشىسىنە ەگجەي-تەگجەيلى بايانداپ بەردى, دەپ جازادى qandastar.kz

جاسۇلان تەمىرباي – سپورت-مەديتسينا سالاسىنىڭ مامانى. ول باعدارلامانىڭ بيىلعى ىرىكتەۋىنە قاتىسىپ, ءبىلىمىن شەتەلدە جەتىلدىرۋدى كوزدەگەن. الايدا سۇحباتتاسۋ كەزەڭىنەن وتە الماعان. ونىڭ توپشىلاۋىنشا, ساتسىزدىكتىڭ باستى سەبەبى – ورىس ءتىلى.

«سۇحباتتاسۋ كەزىندە قاي تىلدە سۇراق قويسا, سول تىلدە جاۋاپ بەرۋ قاجەت. مەنىڭ سۇحباتىم 90% ورىسشا ءوتتى. البەتتە, بۇل مەنىڭ انا ءتىلىم ەمەس. كىشىگىرىم كەمشىلىكتەردىڭ, قاتەلىكتەردىڭ بولۋى زاڭدى. دەيتۇرعانمەن, ءوز باسىم ورىس ءتىلىن جەتكىلىكتى دەڭگەيدە مەڭگەرگەنمىن دەپ ەسەپتەيمىن. ەڭ باستىسى عىلىمي ماقالالاردى وقىپ, ءتۇسىنىپ, كەرەكتى دەڭگەيدە ءتارجىمالاي الامىن. الايدا كوميسسيا مۇشەسى ماعان: «ۆى رازگوۆاريۆاەتە نا رۋسسكوم س اكتسەنتوم. ۆى بۋدەتە پوزوريت كازاحستان» دەپ ايتىپ سالدى», — دەگەن جاسۇلان تەمىربايدىڭ جازباسى ErtenMedia.kz-نىڭ نازارىنا ىلىككەن ەدى.

دارىگەردىڭ ايتۋىنشا, توپتاعى باسقا قاتىسۋشىلارعا قاراعاندا (بارلىعى 9 دارىگەر) ونىڭ اعىلشىن ءتىلى دەڭگەيى جوعارى بولعان. الايدا, كوميسسيا مۇشەلەرى اعىلشىن تىلىنە ەمەس, ورىس تىلىنە كوبىرەك ءمان بەرگەندەي اسەر قالدىرعان.

«ىرگەدەگى رەسەي ەمەس, الىستاعى امەريكاعا وقۋعا تۇسۋگە بارا جاتقان مامان ءۇشىن ەڭ ماڭىزدىسى اعىلشىن ءتىلىن بەسكە ءبىلۋ. بىراق سۇحبات بارىسىندا, ولاي بولمادى. نەگىزىنەن, ورىس تىلىنە ەكپىن بەرگەن سياقتى كۇدىگىم بار. ويتكەنى باعدارلامادان وتكەن 7 دارىگەردىڭ ءبارى — ورىس تىلدىلەر. كوميسسيا مۇشەسى «اكتسەنتپەن سويلەيسىڭ» دەگەننەن كەيىن بارىپ ويلانىپ قالدىم. وسى ۋاقىتقا ەشكىم مەنىڭ (وزگە تىلدەگى) ءسوز ساپتاۋىما ءمان بەرمەگەن ەدى», — دەدى دارىگەر.

كۇندەلىكتى ومىردە دە قازاق تىلىندە سويلەگەندى ءجون سانايتىن مامان ErtenMedia-عا ءتىل جاناشىرى ەكەنىن ايتىپ, «قازاق پەن قازاق قازاقشا سويلەسۋى كەرەك» دەگەن ۇستانىمعا ادال ەكەنىن جەتكىزدى.

ىرىكتەۋدەن وتە الماعان جاسۇلان تەمىرباي قازاقستاندا سپورت مەديتسيناسىنىڭ باسقا سالالاردان كەنجە قالعانىن, ال كوميسسيا مۇشەلەرى بۇل ماماندىققا جەتكىلىكتى دەڭگەيدە ءمان بەرمەگەنىن ايتىپ قىنجىلدى.

«ىرىكتەۋدە وتە الماۋىمنىڭ باسقا دا سەبەپتەرىن ىزدەگەن كەزدە مەن تاڭداعان ماماندىقتىڭ سۇرانىسى تومەن بولعان شىعار دەگەن وي ءتۇيدىم. سپورت دارىگەرىنە دەگەن نەمقۇرايلى كوزقاراس بار سەكىلدى. مەنىمەن قاتار باق سىناعان وزگە جەتى دارىگەر — تراۆماتولوگ, گينەكولوگ, تەراپەۆت. سولاي بولا تۇرا, پرەزيدەنت توقاەۆتىڭ سپورت جانە سپورت ماماندارىنىڭ بىلىكتىلىگىن ارتتىرۋ قاجەت دەگەن جارلىعى بار. جارلىق «بولاشاقتىڭ» سايتىندا دا تۇر. بايقاۋعا قاتىسۋعا دا وسى جارلىق تۇرتكى بولعان ەدى. كوميسسيا مۇشەلەرى بۇدان حابارسىز سەكىلدى اسەر قالدىردى. «سپورت مەديتسيناسى دەيتىن ماماندىق بار ما دەگەندەي ءبىرتۇرلى قارادى», — دەيدى مامان.