Siz oryssha akentpen sóıleısiz, Qazaqstandy uıatqa qaldyrasyz: «Bolashaqqa» qujat tapsyrǵan jigit jaǵdaıdy baıandady

Foto:ertenmedia.kz

Áleýmettik jelide dáriger Jasulan Temirbaıdyń «Bolashaq» baǵdarlamasyna qatysty jazbasy qyzý talqylanýda. Onyń aıtýynsha, suhbat barysynda komıssııa músheleriniń biri «Siz (oryssha) akentpen sóıleısiz, Qazaqstandy uıatqa qaldyrasyz» dep málimdegen. Keleńsiz jaıttyń neden bastalyp, qalaı órbigenin Jasulan Temirbaı ErtenMedia.kz tilshisine egjeı-tegjeıli baıandap berdi, dep jazady qandastar.kz

Jasulan Temirbaı – sport-medıına salasynyń mamany. Ol baǵdarlamanyń bıylǵy irikteýine qatysyp, bilimin shetelde jetildirýdi kózdegen. Alaıda suhbattasý kezeńinen óte almaǵan. Onyń topshylaýynsha, sátsizdiktiń basty sebebi – orys tili.

«Suhbattasý kezinde qaı tilde suraq qoısa, sol tilde jaýap berý qajet. Meniń suhbatym 90% oryssha ótti. Álbette, bul meniń ana tilim emes. Kishigirim kemshilikterdiń, qatelikterdiń bolýy zańdy. Deıturǵanmen, óz basym orys tilin jetkilikti deńgeıde meńgergenmin dep esepteımin. Eń bastysy ǵylymı maqalalardy oqyp, túsinip, kerekti deńgeıde tárjimalaı alamyn. Alaıda komıssııa múshesi maǵan: «Vy razgovarıvaete na rýsskom s akentom. Vy býdete pozorıt Kazahstan» dep aıtyp saldy», — degen Jasulan Temirbaıdyń jazbasy ErtenMedia.kz-nyń nazaryna ilikken edi.

Dárigerdiń aıtýynsha, toptaǵy basqa qatysýshylarǵa qaraǵanda (barlyǵy 9 dáriger) onyń aǵylshyn tili deńgeıi joǵary bolǵan. Alaıda, komıssııa músheleri aǵylshyn tiline emes, orys tiline kóbirek mán bergendeı áser qaldyrǵan.

«Irgedegi Reseı emes, alystaǵy Amerıkaǵa oqýǵa túsýge bara jatqan maman úshin eń mańyzdysy aǵylshyn tilin beske bilý. Biraq suhbat barysynda, olaı bolmady. Negizinen, orys tiline ekpin bergen sııaqty kúdigim bar. О́ıtkeni baǵdarlamadan ótken 7 dárigerdiń bári — orys tildiler. Komıssııa múshesi «akentpen sóıleısiń» degennen keıin baryp oılanyp qaldym. Osy ýaqytqa eshkim meniń (ózge tildegi) sóz saptaýyma mán bermegen edi», — dedi dáriger.

Kúndelikti ómirde de qazaq tilinde sóılegendi jón sanaıtyn maman ErtenMedia-ǵa til janashyry ekenin aıtyp, «qazaq pen qazaq qazaqsha sóılesýi kerek» degen ustanymǵa adal ekenin jetkizdi.

Irikteýden óte almaǵan Jasulan Temirbaı Qazaqstanda sport medıınasynyń basqa salalardan kenje qalǵanyn, al komıssııa músheleri bul mamandyqqa jetkilikti deńgeıde mán bermegenin aıtyp qynjyldy.

«Irikteýde óte almaýymnyń basqa da sebepterin izdegen kezde men tańdaǵan mamandyqtyń suranysy tómen bolǵan shyǵar degen oı túıdim. Sport dárigerine degen nemquraıly kózqaras bar sekildi. Menimen qatar baq synaǵan ózge jeti dáriger — travmatolog, gınekolog, terapevt. Solaı bola tura, prezıdent Toqaevtyń sport jáne sport mamandarynyń biliktiligin arttyrý qajet degen jarlyǵy bar. Jarlyq «Bolashaqtyń» saıtynda da tur. Baıqaýǵa qatysýǵa da osy jarlyq túrtki bolǵan edi. Komıssııa músheleri budan habarsyz sekildi áser qaldyrdy. «Sport medıınasy deıtin mamandyq bar ma degendeı birtúrli qarady», — deıdi maman.