«سىزدىكى جاي ما?»: ەركە ەسماحان ءوزىن حايپ ءۇشىن پايدالانعان ءلايلا سۇلتانقىزىنا قاتتى رەنجىدى

ءانشى ەركە ەسماحان Instagram پاراقشاسىندا بەلگىلى جۋرناليست ءلايلا سۇلتانقىزىنا اشىق رەنىشىن ءبىلدىردى, دەپ حابارلايدى Qandastar.kz

جۋىردا ءلايلا سۇلتانقىزى ءوزىنىڭ YouTube ارناسىندا پلاستيكالىق حيرۋرگتاردى قوناققا شاقىرىپ, وتاندىق جۇلدىزداردىڭ قايسىسى قانداي وتا جاساتقانى تۋرالى سۇحبات جۇرگىزگەن ەدى. دارىگەرلەردىڭ اڭگىمەسىندە ەركە ەسماحاننىڭ ەسىمى دە اتالعان.

دارىگەرلەردىڭ ايتۋىنشا, ول جاعىنا, كوزىنە پلاستيكالىق وتا جاساتقان. قازاقستاندا سۇرانىس جوق بولعاندىقتان, كورەيادا جاساتقانى تۋرالى بولجام ايتتى.

بۇل جاعداي ءانشىنىڭ شامىنا تيگەن سياقتى. ول ءوزىنىڭ ستوريسىندە لايلاعا تىكەلەي جازىپ, مۇنداي قادامدى كۇتپەگەنىن مالىمدەدى:

«ءلايلا حانىم, سىزدىكى ءجاي ما? سۇحباتتاستارىڭىزدىڭ ايتىپ وتىرعان قورقىنىشتى نارسەلەرىنىڭ ەشبىرىن مەن بەتىمە جاساتپاعانىمدى ءسىز وتە جاقسى بىلەسىز. مەنىمەن جاقىن سىيلاس اپكەم رەتىندە وتىرىككە جول بەرمەي, قورعاۋدىڭ ورنىنا, ءوزىڭىز تالقىعا سالىپ وتىرعانىڭىز تاڭعالدىردى», – دەدى ەركە.

سونداي-اق ول ءوزىنىڭ ارتىنان ايتىلعان اڭگىمەلەرگە ءمان بەرمەيتىنىن, الايدا جاقىن ادامداردىڭ اتىن حايپ پەن قارالىم ءۇشىن پايدالانۋىن قۇپتامايتىنىن ايتتى.

«ومىردە جاقىن دەپ جۇرگەن جانداردىڭ مەنىڭ اتىمدى حايپ پەن قارالىمعا پايدالانعانى ۇنامايدى. سەبەبى ءوزىم ونداي ادام ەمەسپىن!», – دەپ جازدى ول.

بۇل وقيعا الەۋمەتتىك جەلىدە قىزۋ تالقىلانىپ, كوپشىلىك ەركەنى جاقتاپ جاتىر. ال سۇلتانقىزى تاراپىنان ازىرگە جاۋاپ بەرىلگەن جوق.