جاڭالىقتار
«سىزگە گۇل جىبەردى». الاياقتار WhatsApp اككاۋنتىن بۇزۋدىڭ جاڭا ءتاسىلىن ويلاپ تاپتى
فوتو: كورنەكى سۋرەت
ءتارتىپ ساقشىلارى الاياقتار جالعان حابارلاما جىبەرىپ, كود سۇراۋ ارقىلى WhatsApp اككاۋنت بۇزۋدىڭ جاڭا ءتاسىلىن ويلاپ تاپقانىن ەسكەرتەدى, – دەپ حابارلايدى qandastar.kz Massaget.kz سىلتەمە جاساپ.
بۇل تۋرالى ءتارتىپ ساقشىسى alau.kz سايتىنا ايتىپ بەرگەن.
«سىزگە بىرەۋ گۇل جىبەردى, راستاۋ ءۇشىن كودتى ايتىڭىز» دەپ حابارلاساتىن نەمەسە حابارلاما جازاتىن الاياقتار وسىلايشا الەۋمەتتىك جەلىدەگى اككاۋنتىڭىزدى بۇزىپ, تانىستارىڭىزدان قارىزعا اقشا سۇرايتىن بولعان.
«تەلەفونىڭىزعا «تاپسىرىستى جەتكىزۋ» دەگەن حابارلاما كەلۋى مۇمكىن نەمەسە بەيتانىس نومىردەن قوڭىراۋ شالۋى مۇمكىن. «سىزگە بىرەۋ گۇل جىبەردى, قابىلداۋ ءۇشىن راستاڭىز, سىلتەمە ارقىلى ءوتىڭىز, كەلىسىم بەرىڭىز» دەگەن ءتۇرلى مازمۇندا حات جازۋى مۇمكىن. وسىلايشا, گۇلدى الۋ ءۇشىن سىلتەمە ارقىلى وتۋگە نەمەسە سمس-كود ايتۋعا ءوتىنىش جاسايدى. ەگەر وسىنداي وقيعاعا تاپ بولساڭىز, الاياقتىڭ ارباۋىنا ءتۇسىپ, ايتقانىن ىستەمەڭىز. وسىلاي الاياقتار سىلتەمەلەر ارقىلى جەكە دەرەكتەرگە قول جەتكىزەدى», – دەپ مالىمدەدى قوستاناي وبلىسى پوليتسيا دەپارتامەنتىنىڭ وڭتۇستىك ءبولىمى باسشىسىنىڭ ورىنباسارى دامير رايسوۆ.
