سقو-دا ءبىر وتباسى ۋلانىپ, ەكى بالا قايتىس بولدى: سەبەبى انىقتالدى

سولتۇستىك قازاقستان وبلىسىندا وتباسىنىڭ ۋلانۋ سەبەبى انىقتالدى. سالدارىنان ەكى بالا قازا بولعان ەدى,-دەپ حابارلايدى Qandastar.kz

ۋلانۋ دەرەگى بويىنشا پوليتسەيلەر بۇعان دەيىن «ابايسىزدا ادامداردىڭ جاپپاي ۋلانۋىنا اكەپ سوققان جانە ابايسىزدا ەكى نەمەسە ودان دا كوپ ادامنىڭ ولىمىنە اكەپ سوقتىرعان سانيتارلىق ەرەجەلەر مەن گيگيەنالىق نورماتيۆتەردى بۇزۋ»بابى بويىنشا تەرگەۋدى باستاعان ەدى.

دۇيسەنبى, 9 شىلدەدە وتباسىنىڭ نيتريتتەردەن, ياعني ازوت قىشقىلىنىڭ تۇزدارىنان ۋلانعانى بەلگىلى بولدى.

«سوتالدى تەرگەۋ اياسىندا بىرقاتار ساراپتامالار جۇرگىزىلدى, ولاردىڭ ناتيجەلەرى بويىنشا بالالاردىڭ ولىمىنە نيتريتتەردەن جەدەل ۋلانۋ سەبەپ بولدى. قازىرگى ۋاقىتتا ءىستىڭ بارلىق ءمان-جايىن جان-جاقتى, تولىق جانە وبەكتيۆ زەرتتەۋگە باعىتتالعان سوتالدى تەرگەۋ جالعاسىپ جاتىر», – دەپ حابارلادى  وبلىستىق ىشكى ىستەر دەپارتامەنتىنىڭ ءباسپاسوز قىزمەتى.

ۆەدومستۆو قىلمىستىق ءىس جۇرگىزۋ كودەكسىنىڭ 201-بابىنا سايكەس قىلمىستىق ءىستى تەرگەۋدىڭ بارىسى تۋرالى باسقا مالىمەتتەر جاريا ەتۋگە جاتپايدى دەگەن قورىتىندىعا كەلدى.

سانيتارلىق دارىگەرلەردىڭ ايتۋىنشا, نيتريتتەر تاعامعا ەت ونىمدەرىمەن بىرگە تۇسەدى. ولار كونسەرۆانت, باكتەرياعا قارسى جانە تۇزداۋشى ينگرەديەنت رەتىندە تۇزداۋ, مارينادتاۋ ءۇشىن قولدانىلادى.

ەسكە سالايىق, ەكى بالا ۋلانىپ قايتىس بولعان اۋىلدا جەرگىلىكتى دۇكەندە ۇيدە جاسالعان تۇشپارا ساتىلعان. 14 ماۋسىمدا قىزىلجار اۋدانى نادەجكا اۋىلىندا ءبىر وتباسى: اناسى مەن ءۇش بالاسى ۋلانىپ قالدى. ءۇش جاسار بالا مەن جەتى جاسار قىز كوز جۇمدى. سول كەزدە بالالاردىڭ 28 جاستاعى اناسى اۋىر حالدە ءبىرىنشى قالالىق اۋرۋحانانىڭ جۇقپالى اۋرۋلار بولىمىنە جەتكىزىلگەن. 2014 جىلى تۋعان بالا وبلىستىق بالالار اۋرۋحاناسىنا جاتقىزىلدى. ەمدەۋدەن كەيىن ولار ساۋىعىپ, ۇيلەرىنە شىعارىلدى.

بالالاردىڭ اتا-اناسى شۇجىق پەن دۇكەننەن الىنعان تۇشپارا جەپ, ءتاتتى گازدالعان سۋسىن ىشكەندەرىن ايتقان.