سقو-دا ءبىر وتباسىنىڭ تۇشپارادان ۋلانىپ, ەكى بالا كوز جۇمدى: اۋىل مەدبيكەسىنىڭ ۇستىنەن قىلمىستىق ءىس قوزعالدى

فوتو: freepik

سولتۇستىك قازاقستان وبلىسى نادەجكا شاعىن اۋىلىندا 13 ماۋسىمدا ءبۇتىن ءبىر وتباسى تاماقتان ۋلانىپ, ورىمدەي ەكى بالا كوز جۇمعان ەدى. بىراق بۇل ماسەلە ءالى شەشىمىن تاپقان جوق. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

باستاپقىدا باق حابارلاعانداي, وتباسى تاماقتان ۋلانعان. اناسىنىڭ سوزىنشە, كەشكى اسقا بارلىعى پيتستسا, شۇجىق, دۇكەندەگى تۇشپارانى جەپ, گازدالعان سۋسىن ىشكەن. ارتىنشا وتباسى مۇشەلەرىنىڭ بارلىعى اۋىرىپ قالعان.

الدىمەن ءۇش جاسار ۇلى تاڭەرتەڭ ۇيدە اناسىنىڭ كوزىنشە كوز جۇمعان. كەلەسى كۇنى اۋرۋحانادا جەتى جاسار قىزى و دۇنيەلىك بولدى. بىرنەشە كۇن بويى ون جاسار ۇلى مەن اناسى جانساقتاۋ بولىمىندە جاتىپ, امان قالدى. ال وتاعاسى اۋرۋحاناعا جاتۋدى قاجەت ەتپەگەن, دەگەنمەن ول دا ءوزىن ناشار سەزىنگەن.

سودان كەيىن ۇيگە تۇندە جەرگىلىكتى اۋرۋحانانىڭ مەدبيكەسى شاقىرىعان. ول بارلىعىن تەكسەرىپ, العاشقى مەديتسينالىق كومەك كورسەتكەن. تاڭەرتەڭ ءۇيدىڭ كەنجەسى كوز جۇمعان سوڭ, بۇكىل وتباسى ەكى جەدەل جاردەم كولىگىمەن پەتروپاۆلعا جەتكىزىلگەن. ولارعا شۇعىل گوسپيتاليزاتسيا قاجەت بولدى.

«1996 جىلى تۋعان انا قالالىق ءبىرىنشى اۋرۋحانانىڭ جۇقپالى اۋرۋلار بولىمىنە جەتكىزىلدى. وبلىستىق بالالار اۋرۋحاناسىنا 2017 جانە 2014 جىلى تۋعان ەكى بالا جەتكىزىلدى. ولار بىردەن جانساقتاۋ بولىمىنە جاتقىزىلدى. 2017 جىلى تۋعان قىز اۋىر حالدە ءتۇسىپ, جاعدايى تۇراقسىز بولعان. ول جاساندى جەلدەتۋگە اۋىستىرىلدى. كەشكە تولىق ەمدەلگەنىنە قاراماستان, قايتىس بولدى», – دەدى وبلىستىڭ دەنساۋلىق ساقتاۋ باسقارماسى.

دارىگەرلەر بالالاردىڭ ءولىمىنىڭ الدىن الا سەبەبىن توكسيكالىق تاماق ينفەكتسياسى جانە تسەرەبرالدى ءىسىنۋ دەپ اتادى. تەكسەرۋدەن كەيىن پوليتسەيلەر بالالاردىڭ ولىمىنە نيتريتپەن ۋلانۋ سەبەپ بولعانىن حابارلادى. قۇقىق قورعاۋ ورگاندارى ولاردىڭ تاعامعا قالاي تۇسكەنىن ناقتىلامادى.

سولتۇستىك قازاقستان وبلىسىنىڭ پوليتسيا دەپارتامەنتى «ابايسىزدا ادامداردىڭ جاپپاي ۋلانۋىنا جانە ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان سانيتارلىق ەرەجەلەر مەن گيگيەنالىق نورمالاردى بۇزۋ» فاكتىسى بويىنشا قىلمىستىق ءىس قوزعادى. تەرگەۋ جۇرگىزىپ جاتىر. بىراق قىلمىس ايعاعى بولماعاندىقتان توقتاتىلدى.

«وسى قىلمىستىق ءىس ماتەريالدارى جەكە وندىرىسكە ءبولىنىپ, قىلمىستىق كودەكستىڭ 317-بابىنىڭ 4-بولىگى (مەديتسينا نەمەسە فارماتسەۆتيكا قىزمەتكەرىنىڭ كاسىپتىك مىندەتتەرىن تيىسىنشە ورىنداماۋى, ابايسىزدا ەكى نەمەسە ودان دا كوپ ادامنىڭ ولىمىنە الىپ كەلگەن ءىس-ارەكەتتەر) بويىنشا سوتقا دەيىنگى تەرگەۋ باستالدى», – دەلىنگەن حابارلامادا.

دەنساۋلىق ساقتاۋ باسقارماسىنىڭ مالىمەتىنشە, اۋىلدىق مەدبيكە 15 تامىزدا ءوز ەركىمەن جۇمىستان كەتكەن.