سقو-دا قوماقتى بيۋدجەت قاراجاتى ۇرلانعان

فوتو: اشىق دەرەككوز

سولتۇستىك قازاقستان وبلىسىنىڭ پروكۋرورلارى قونىس اۋدارۋ باعدارلاماسى بويىنشا بيۋدجەت قاراجاتىن ۇرلاۋ فاكتىلەرىن انىقتادى, دەپ حابارلايدى qandastar.kz

«قاداعالاۋ ورگانى تەكسەرۋلەر اياسىندا الەۋمەتتىك شارتتىڭ قابىلدانعان مىندەتتەمەلەرىن ورىنداماۋ جانە تۇرعىن ءۇي قۇنىن اسىرا باعالاۋ ماقساتىندا قولدانىستاعى زاڭنامانىڭ ورەسكەل بۇزىلۋىن انىقتادى.

وسىلايشا, ايىرتاۋ, ع.مۇسىرەپوۆ, جامبىل اۋداندارىندا قونىس اۋدارۋ باعدارلاماسىنا قاتىسۋشىلار الەۋمەتتىك كودەكستىڭ تالاپتارىنا جانە ادامداردى ەرىكتى تۇردە قونىس اۋدارۋ قاعيدالارىنىڭ تالاپتارىنا قاراماستان, تۇرعىن ءۇي ساتىپ الۋ شىعىندارىن وتەۋ ءۇشىن مەملەكەتتىك وتەماقىنى بارىنشا ۇلكەن كولەمدە الۋ ماقساتىندا  ولاردىڭ ناقتى قۇنىن جاساندى تۇردە اسىرا كورسەتكەن.

وسىنداي زاڭسىز ارەكەتتەردەن مەملەكەتكە جالپى سوماسى 11,3 ملن تەڭگە شىعىن كەلتىرىلگەن», – دەلىنگەن حابارلامادا.

وسى فاكتىلەرگە سۇيەنە وتىرىپ, پروكۋراتۋرا قىلمىستىق كودەكستىڭ 190-بابىنا «الاياقتىق» سايكەس, سوتقا دەيىنگى تەرگەپ-تەكسەرۋ جۇمىستارىن باستادى.

اۋداندىق سوت ۇكىمدەرىمەن باعدارلامانىڭ 3 قاتىسۋشىسى ءبىر جىلدان ءۇش جىلعا دەيىنگى مەرزىمگە باس بوستاندىعىن شەكتەۋگە سوتتالدى (زاڭدى كۇشىنە ەنگەن).

سونىمەن بىرگە, الەۋمەتتىك شارت بويىنشا ءوز مىندەتتەمەلەرىن بۇزا وتىرىپ, مەملەكەتتەن قارجىلاي كومەك العان قونىس اۋدارۋ باعدارلاماسىنا قاتىسۋشىلار تۇراقتى تۇرۋ ءۇشىن قونىس اۋدارعان ورنىنان رەسپۋبليكانىڭ باسقا ايماقتارىنا كوشكەن.

وسىعان قاراماستان, جەرگىلىكتى اتقارۋشى ورگانداردىڭ شەنەۋنىكتەرى 103,6 ملن تەڭگە كولەمىندەگى تولەمدەردى ءوندىرىپ الۋ شارالارىن قولدانباعان.

پروكۋرورلىق قاداعالاۋ اكتىلەرىنە سايكەس, جەرگىلىكتى اتقارۋشى ورگانداردىڭ 25 قىزمەتكەرى (ونىڭ ىشىندە مانساپ ورتالىقتارى فيليالىنىڭ 11 باسشىسى) تارتىپتىك جاۋاپكەرشىلىككە تارتىلىپ, 19,1 ملن تەڭگە كولەمىندەگى بيۋدجەت قاراجاتى وتەلدى.

قالعان سوماعا تالاپ ارىزدار سوتقا بەرىلىپ, قارالۋدا.

بيۋدجەتتىك قاراجاتتى جۇمساۋ ماسەلەسى وبلىستىق پروكۋراتۋرانىڭ باقىلاۋىندا.