سقو-دا قىتايلىق كاسىپورىندا جارىلىس بولىپ, جۇمىسشىلار مەن قۇتقارۋشىلار زارداپ شەكتى

فوتو: ۆيدەو كادرلارىنان سكرين

سولتۇستىك قازاقستان وبلىسى تايىنشا اۋدانىنا قاراستى يليچەۆكا اۋىلىنداعى قىتايلىق «ايتسزيۋي» كورپوراتسياسىنا تيەسىلى اگروونەركاسىپتىك كاسىپورىندا جارىلىس بولدى, دەپ جازدى qandastar.kz 

جۇمىسشىلار مەن قۇتقارۋشىلار زارداپ شەكتى. بۇل تۋرالى Stan.kz اقپارات اگەنتتىگى حابارلايدى.

جارىلىس ءساتىن جەرگىلىكتى تۇرعىندار ۆيدەوعا ءتۇسىرىپ العان. وقيعا جانارماي قۇيۋ شلانگىسىنىڭ ۇزىلۋىنەن بولعان.

«الدىن الا مالىمەت بويىنشا, كاسىپورىننىڭ ەكى جيناعىشىندا جانۋ جانە جارىلىس ورىن العان. ودان كەيىن Volvo ماركالى گاز تاسىمالداۋشى كولىك ورتەنگەن. توعىز ادام زارداپ شەكتى. ولاردىڭ سەگىزى اۋرۋحاناعا جاتقىزىلدى», — دەپ حابارلادى سقو پوليتسيا دەپارتامەنتى.

دارىگەرلەر ءتۇرلى دارەجەدەگى كۇيىك پەن جاراقات العان زارداپ شەككەندەردىڭ ءومىرى ءۇشىن كۇرەسىپ جاتىر. زارداپ شەككەندەردىڭ اراسىندا كاسىپورىنعا گاز جەتكىزگەن كوكشەتاۋ قالاسىنىڭ تۇرعىندارى مەن كومەككە كەلگەن قۇتقارۋشىلار دا بار ەكەنى بەلگىلى بولدى.

“قۇتقارۋشىلاردىڭ جەدەل, ۇيلەسىمدى جانە كاسىبي ءىس-قيمىلدارىنىڭ ارقاسىندا 50 ش. م. الاڭدا ءورت ساعات 20.57-دە تولىعىمەن ءسوندىرىلدى”, – دەلىنگەن تجم حابارلاماسىندا.

eGov مالىمەتتەرى بويىنشا, «تايىنشا ماي» جشس ماي جانە توڭ ماي وندىرۋمەن اينالىسادى. كاسىپورىن قىتايلىق «ايتسزيۋي» كورپوراتسياسىنا تيەسىلى. بۇل كومپانيا اگروونەركاسىپتىك ءوندىرىس پەن حالىقارالىق لوگيستيكاعا ماماندانعان.