سمايىلوۆ: بيىل 40-تان استام اۋديتورلىق شارا وتكىزىلەدى

فوتو: اقوردا

مەملەكەت باسشىسى قاسىم-جومارت توقاەۆ جوعارى اۋديتورلىق پالاتانىڭ توراعاسى ءاليحان سمايىلوۆتى قابىلدادى,  دەپ حابارلايدى qandastar.kz

ءاليحان سمايىلوۆ جوعارى اۋديتورلىق پالاتانىڭ بىلتىر اتقارعان قىزمەتىنىڭ قورىتىندىلارى مەن وسى جىلعا ارنالعان جوسپارى جونىندە مالىمەت بەردى.

بىلتىر 214 نىساندا قۇنى شامامەن 11 تريلليون تەڭگەنى قۇرايتىن 27 اۋديتورلىق ءىس-شارا وتكىزىلگەنى تۋرالى باياندادى. سونىڭ ناتيجەسىندە جالپى سوماسى 862 ميلليارد تەڭگە بولاتىن ءتۇرلى نورمالاردىڭ بۇزىلعانى انىقتالعان.

تەكسەرىستەردىڭ قورىتىندىسى بويىنشا بيۋدجەتكە 135 ميلليارد تەڭگە قايتارىلعان. بۇل 2023 جىلى وتەلگەن قارجىدان بەس ەسە ارتىق.

جاپ توراعاسى قۇرىلىس نىساندارىنداعى باعا قالىپتاستىرۋ, وڭدەۋ ونەركاسىبى جوبالارىن قارجىلاندىرۋ, اۋىل شارۋاشىلىعىن سۋبسيديالاۋ ىسىندە ولقىلىقتار ۇنەمى بايقالاتىنىن ايتتى. جوعارى اۋديتورلىق پالاتا بارلىق انىقتالعان زاڭ بۇزۋشىلىقتى جويۋ ءۇشىن ۇكىمەتكە ۇسىنىم بەرىپ, جاۋاپتى مەملەكەتتىك ورگاندارعا نۇسقاما جولداعان.

سمايىلوۆ بيىل 40-تان استام اۋديتورلىق ءىس-شارا وتكىزۋ جوسپارلانعانىن جەتكىزدى.

مەملەكەت باسشىسىنىڭ تاپسىرماسى بويىنشا استانا جانە الماتى قالالارى, سولتۇستىك قازاقستان, قوستاناي جانە جامبىل وبلىستارى, سونداي-اق «سامۇرىق-قازىنا» قورى, «قازاتومونەركاسىپ» ۇلتتىق كومپانياسى, KEGOC كاسىپورنى, ۇلتتىق بانك, توتەنشە جاعدايلار مينيسترلىگى بيۋدجەتتەرىنىڭ ورىندالۋى تەكسەرىلەدى.

عىلىم, قورعانىس, قۇقىقتىق ءتارتىپتى ساقتاۋ, سپورت, الەۋمەتتىك قامتاماسىز ەتۋ, ورمان شارۋاشىلىعى سالالارىندا دا اۋديتورلىق تەكسەرىستەر جۇرگىزىلەدى.

پرەزيدەنت مەملەكەتتىك اۋديت جۇيەسىن جەتىلدىرۋ جونىندەگى جۇمىستى جالعاستىرۋدى تاپسىردى. سونىمەن قاتار بيۋدجەت قارجىسىنىڭ يگەرىلۋىن ءتيىمدى باقىلاۋ ءۇشىن زاماناۋي تسيفرلىق شەشىمدەردى ەنگىزۋدىڭ ماڭىزىنا نازار اۋداردى.