Smaıylov: Bıyl 40-tan astam aýdıtorlyq shara ótkiziledi

Foto: Aqorda

Memleket basshysy Qasym-Jomart Toqaev Joǵary aýdıtorlyq palatanyń tóraǵasy Álıhan Smaıylovty qabyldady,  dep habarlaıdy qandastar.kz

Álıhan Smaıylov Joǵary aýdıtorlyq palatanyń byltyr atqarǵan qyzmetiniń qorytyndylary men osy jylǵa arnalǵan jospary jóninde málimet berdi.

Byltyr 214 nysanda quny shamamen 11 trıllıon teńgeni quraıtyn 27 aýdıtorlyq is-shara ótkizilgeni týraly baıandady. Sonyń nátıjesinde jalpy somasy 862 mıllıard teńge bolatyn túrli normalardyń buzylǵany anyqtalǵan.

Tekseristerdiń qorytyndysy boıynsha bıýdjetke 135 mıllıard teńge qaıtarylǵan. Bul 2023 jyly ótelgen qarjydan bes ese artyq.

JAP tóraǵasy qurylys nysandaryndaǵy baǵa qalyptastyrý, óńdeý ónerkásibi jobalaryn qarjylandyrý, aýyl sharýashylyǵyn sýbsıdııalaý isinde olqylyqtar únemi baıqalatynyn aıtty. Joǵary aýdıtorlyq palata barlyq anyqtalǵan zań buzýshylyqty joıý úshin Úkimetke usynym berip, jaýapty memlekettik organdarǵa nusqama joldaǵan.

Smaıylov bıyl 40-tan astam aýdıtorlyq is-shara ótkizý josparlanǵanyn jetkizdi.

Memleket basshysynyń tapsyrmasy boıynsha Astana jáne Almaty qalalary, Soltústik Qazaqstan, Qostanaı jáne Jambyl oblystary, sondaı-aq «Samuryq-Qazyna» qory, «Qazatomónerkásip» ulttyq kompanııasy, KEGOC kásiporny, Ulttyq bank, Tótenshe jaǵdaılar mınıstrligi bıýdjetteriniń oryndalýy tekseriledi.

Ǵylym, qorǵanys, quqyqtyq tártipti saqtaý, sport, áleýmettik qamtamasyz etý, orman sharýashylyǵy salalarynda da aýdıtorlyq tekserister júrgiziledi.

Prezıdent memlekettik aýdıt júıesin jetildirý jónindegi jumysty jalǵastyrýdy tapsyrdy. Sonymen qatar bıýdjet qarjysynyń ıgerilýin tıimdi baqylaý úshin zamanaýı ıfrlyq sheshimderdi engizýdiń mańyzyna nazar aýdardy.