جاڭالىقتار
سمايىلوۆ: دەنساۋلىق ساقتاۋ مينيسترلىگىن تەكسەرۋ بارىسىندا 3,7 ملرد سوماعا زاڭ بۇزۋشىلىق انىقتالدى
فوتو: ەگەمەن قازاقستان
جوعارى اۋديتورلىق پالاتانىڭ توراعاسى ءاليحان سمايىلوۆ دەنساۋلىق ساقتاۋ مينيسترلىگى مەن ونىڭ ۆەدومستۆولىق باعىنىستى ۇيىمدارى قىزمەتىنىڭ تيىمدىلىگىنە جۇرگىزىلگەن ءاۋديتتىڭ قورىتىندىسىن جاريالادى, – دەپ حابارلايدى qandastar.kz.
جوعارى اۋديتورلىق پالاتانىڭ مۇشەسى تىلەگەن قاسكين مالىمدەگەندەي, فارماتسەۆتيكالىق ونىمدەردىڭ اينالىمىندا 36 جۇيەلى كەمشىلىك انىقتالدى.
اۋديت فارماتسەۆتيكا سالاسىن دامىتۋعا كەشەندى كوزقاراستىڭ جوقتىعىن كورسەتتى. مىسالى, وتاندىق شيكىزات ءدارى-دارمەك وندىرىسىندە ءىس جۇزىندە پايدالانىلمايدى, ال يمپورتتىق كومپونەنتتەردىڭ ساپاسىنا ناقتى تالاپ بەلگىلەنبەگەن.
جالپى العاندا, وتاندىق دارىلىك زاتتار مەن مەديتسينالىق ماقساتتاعى بۇيىمداردى وندىرۋشىلەردى مەملەكەتتىك قولداۋ شارالارىمەن قامتۋ تومەن – 20%-دان از كۇيىندە قالىپ وتىر. 2023 جىلعى ساتۋ ناتيجەلەرى بويىنشا وتاندىق دارىلەردىڭ نارىقتاعى ۇلەسى 18% قۇرايدى», – دەپ حابارلادى جاپ مۇشەسى.
باعانى مەملەكەتتىك رەتتەۋ دە ءتيىستى دەڭگەيدە جۇرگىزىلمەيدى.
«شەكتى باعانى بەلگىلەۋ ادىستەمەسىن دەنساۋلىق ساقتاۋ مينيسترلىگى جۇيەسىز ازىرلەگەن. نەلىكتەن سالىستىرمالى باعاعا تالداۋ جۇرگىزىلمەيدى?», – دەگەن ساۋال قويدى ءاليحان سمايىلوۆ.
بۇل سۇراققا دەنساۋلىق ساقتاۋ ءمينيسترى اقمارال ءالنازاروۆا بىلاي جاۋاپ قاتتى: تالداۋ قورىتىندىسىنا كەلسەك, بۇگىن بارلىق باعا بويىنشا 6,5 مىڭنان استام ءدارى-دارمەك تەكسەرىلەدى. جۇمىس توبى قۇرىلدى. جىل سوڭىنا دەيىن ءبىز كوتەرمە جانە بولشەك ساۋدا سەگمەنتىندە بەلگىلەنگەن باعالاردى قايتا قارايمىز دەپ ويلايمىن.
P.S ايتا كەتەيىك, سالادا 3,7 ملرد تەڭگەنى قۇرايتىن بۇزۋشىلىقتار انىقتالىپ وتىر. ونىڭ ىشىندە قارجىلىق بۇزۋشىلىقتار – 538 ملن تەڭگە, ءتيىمسىز جوسپارلاۋ – 2,8 ملرد تەڭگە, اكتيۆتەردى ءتيىمسىز پايدالانۋ – 385 ملن تەڭگە. بيۋدجەتتىڭ ىقتيمال شىعىنى – 21,7 ملرد تەڭگە.
سونداي-اق جاقىندا تەكسەرۋگە كەدەرگى كەلتىرگەنى ءۇشىن مەديتسينالىق جانە فارماتسەۆتيكالىق باقىلاۋ كوميتەتىنىڭ باسشىسى اكىمشىلىك جاۋاپكەرشىلىككە تارتىلعانى دا حابارلاندى.
