«سوعىستى توقتاتۋ تۋرالى كەلىسىمگە كەلدىك»: ترامپ پۋتينمەن شۇعىل كەلىسسوز جۇرگىزبەك

فوتو:Brandon Bell /كرەمل

اقش پرەزيدەنتى دونالد ترامپ پۋتينمەن جارتى ساعاتتاي سويلەسىپ, كەيىن ۋكراينا پرەزيدەنتى ۆلاديمير زەلەنسكيگە قوڭىراۋ شالدى. رەسەي پرەزيدەنتىمەن اڭگىمەدەن كەيىن ترامپ ەكى تاراپ شۇعىل تۇردە كەلىسسوز جۇرگىزەتىنىن ايتتى. بۇل تۋرالى qandastar.kz  اقپارات اگەنتتىگى BBC-گە سىلتەمە جاساپ حابارلايدى.

دونالد ترامپ پۋتينمەن اراداعى اڭگىمە ۇزاق ءارى ناتيجەلى بولعانىن ايتادى.

“قازىر عانا رەسەي پرەزيدەنتى ۆلاديمير پۋتينمەن تەلەفون ارقىلى ۇزاق ءارى ناتيجەلى اڭگىمە جۇرگىزدىك. ءبىز ۋكراينا, تاياۋ شىعىس, ەنەرگەتيكا, جاساندى ينتەللەكت, “دوللاردىڭ كۇشى” جانە باسقا دا كوپتەگەن تاقىرىپتاردى تالقىلادىق. بىراق ەڭ اۋەلى ەكەۋمىز رەسەي مەن ۋكراينا اراسىنداعى سوعىستى توقتاتۋ تۋرالى كەلىسىمگە كەلدىك. ەكى تاراپ شۇعىل كەلىسسوز جۇرگىزۋگە دايىندالىپ جاتىر”, – دەيدى ترامپ.

كوپ ۇزاماي ءپۋتيننىڭ ءباسپاسوز حاتشىسى دميتري پەسكوۆ ەكى پرەزيدەنت اراسىنداعى اڭگىمەنى راستادى. سونداي-اق ونىڭ ايتۋىنشا, ترامپ پەن پۋتين قاتار تۇتقىندار الماسۋىن, يراننىڭ يادرولىق باعدارلاماسى جانە رەسەي مەن اقش اراسىنداعى ىنتىماقتاستىقتى تالقىعا سالعان.

دميتري پەسكوۆ پۋتين ترامپتىڭ كەلىسسوز تۋرالى ۇسىنىسىنا قاتىستى قاقتىعىستىڭ تۇپكى سەبەپتەرىن جويىپ, بەيبىت كەلىسسوزدەر ارقىلى ۇزاق مەرزىمدى رەتتەۋگە قول جەتكىزۋگە بولاتىن ايتتى.

كرەمل ءپۋتيننىڭ رەسەيدە امەريكالىق شەنەۋنىكتەردى, ونىڭ ىشىندە ۋكراينامەن اينالىساتىنداردى قابىلداۋعا دايىن ەكەندىگىن جەتكىزدى. الايدا پەسكوۆ كەلىسسوزدەردىڭ جاقىن ارادا باستالۋى مۇمكىن ەكەنىن ايتقان جوق.

امەريكالىق تاراپتان كەلىسسوزدەردى مەملەكەتتىك حاتشى ماركو رۋبيو, ورتالىق بارلاۋ باسقارماسىنىڭ ديرەكتورى دجون رەتكليفف, ۇلتتىق قاۋىپسىزدىك جونىندەگى كەڭەسشى مايكل ۋولتس جانە ارنايى وكىل ستيۆ ۆيتكوفف جۇرگىزەدى.

پۋتين ترامپتى ماسكەۋگە شاقىردى. ەكى ەل پرەزيدەنتى جەكە كەزدەسۋ ۇيىمداستىرۋعا جانە جەكە بايلانىستاردى جالعاستىرۋعا كەلىستى.

“مەن رەسەي پرەزيدەنتى پۋتينگە ۋاقىت ءبولىپ, سۇحباتتاستقانى ۇشىن جانە كەشە كەشكىسىن اقۇيدە تانىستىرعان مارك فوگەلدى بوساتقانى ءۇشىن العىس ايتامىن. ءبىزدىڭ كۇشىمىز جاقىن ارادا تابىستى ناتيجەگە اكەلەدى دەپ سەنەمىن”, – دەيدى اقش پرەزيدەنتى.

ترامپ پۋتينمەن العاشقى كەزدەسۋى ساۋد ارابياسىندا وتەتىنىن مالىمدەدى.