سولتۇستىك قازاقستاندا ىشىمدىكتەن تاعى ءبىر اۋىل باس تارتتى

سقو-دا اراق-شاراپتان باس تارتقان اۋىلدار سانى كوبەيىپ كەلەدى. سولاردىڭ ءبىرى – ەسىل اۋدانىنا قاراستى ەڭبەك ەلدىمەكەنى. تۇرعىندار ءوز اۋىلىن جايلى ءارى قاۋىپسىز ەتۋ ماقساتىندا وسىنداي شەشىمگە كەلگەن, دەپ حابارلادى Qandastar.kz اقپارات پورتالى Almaty.tv-عا سىلتەمە جاساپ.

ەڭبەك اۋىلى – وبلىس كولەمىندە الكوگولدەن رەسمي تۇردە باس تارتقان ون سەگىزىنشى ەلدىمەكەن. تۇرعىندار بۇل يگى باستامانى وزگەلەرگە ۇلگى ەتىپ, كەڭىنەن ناسيحاتتاۋعا نيەتتى. پروكۋراتۋرا وكىلدەرى مۇنداي تاجىريبە قىلمىستى ازايتىپ, ۇرلىق, ءتۇرلى جانجالدى ساپ تىيادى دەپ وتىر.

«بارشاعا بەلگىلى, الكوگول جوق جەردە ءتارتىپ بار. ال ءتارتىپ بار جەردە زاڭ كۇشەيەدى. بۇعان مىسال – قاراعاي اۋىلى. سوڭعى 3 جىلدا بىردە-ءبىر قىلمىستىق جانە اكىمشىلىك قۇقىقبۇزۋشىلىق ارەكەتتەر تىركەلمەگەن. پروكۋراتۋرا مۇنداي يگى باستامالاردى قولدايدى. سونداي-اق ۇلگىلى اۋىلدار سانى ارتا تۇسەتىنىنە سەنەمىز», — دەدى ەسىل اۋدانىنىڭ پروكۋرورى كەنجەبەك قوجاحمەتوۆ.

اششى سۋدان باس تارتقالى بەرى جەرگىلىكتى كاسىپكەرلەر اۋىلدى دامىتۋعا ۇلەس قوسۋدىڭ ءتۇرلى جولىن قاراستىرىپ, يگى باستامالاردى جۇزەگە اسىرا باستاعان. قايىربەك قوجاسوۆ جاڭا باستاۋىش مەكتەپتىڭ قۇرىلىسىن قولعا الىپتى. بۇل بالالاردىڭ وزگە ەلدىمەكەندەرگە قاتىناماي-اق ءوز اۋىلىندا ساپالى ءبىلىم الۋىنا مۇمكىندىك بەرەدى.

«شاعىن 50 ورىندىق باستاۋىش مەكتەپ سالىپ جاتىرمىز. ىشىندە سپورت زالى, 4 سىنىپقا ارنالعان شاعىن ورتالىق, اسحاناسى بار. مەدبيكەنىڭ كابينەتى جابدىقتالعان. مامىردا باستادىق, بيىل جاڭا وقۋ جىلىنا قولدانىسقا بەرەمىز دەگەن جوسپار بار»,-دەدى ەڭبەك اۋىلىنىڭ تۇرعىنى قايىربەك قوجاسوۆ.

كاسىپكەردىڭ ايتۋىنشا, جاڭا الەۋمەتتىك نىسان – اۋىل بولاشاعىنا سالىنعان ماڭىزدى ينۆەستيتسيا. ونىڭ سوزىنشە, زاماناۋي سىنىپتارمەن, مەديتسينالىق بولمەلەرمەن جابدىقتالاتىن مەكتەپ بالالار ءۇشىن جايلى ءارى قاۋىپسىز ءبىلىم ورداسىنا اينالماق.

«كاسىپكەر دەنە شىنىقتىرۋمەن اينالىساتىن ورنى بار باستاۋىش مەكتەبىن سالىپ جاتىر. ول ىسىنە ۇلكەن جاۋاپكەرشىلىكپەن قارايدى. سوندىقتان تەك راقمەت ايتىپ قانا قويماي, وبلىستاعى اۋىل شارۋاشىلىعى سالاسىنداعى باسشىلارعا ۇلگى ەتىپ كورسەتۋگە بولادى», — دەدى سقو-نىڭ اكiمi عاۋەز نۇرمۇحامبەتوۆ.

ەڭبەك اۋىلىنىڭ تابىستى دامۋى باسقا وڭىرلەرگە دە ۇلگى بولىپ وتىر. ماسەلەن ەسىل اۋدانىنا قاراستى يلينكا اۋىلىندا جەرگىلىكتى كاسىپكەر الەكساندر بۋرليوۆ زاماناۋي سپورت كەشەنىن اشىپ, اباتتاندىرۋ ىسىنە دە بەت بۇرعان. بۇل ەلدىمەكەننىڭ الەۋەتىن ارتتىرىپ, تۇرعىنداردىڭ ءومىر ءسۇرۋ ساپاسىن جاقسارتۋعا باعىتتالعان.