جاڭالىقتار
سوندا مەكتەپ ءبىلىم بەرمەي مە?
ەلدە قوسىمشا ءبىلىم بەرۋ ۇيىمدارى مەن ساۋىقتىرۋ لاگەرلەرىن كوبەيتۋ قاجەتتىگى تۋىنداپ تۇر. ونىڭ ۇستىنە سالادا مامان دا جوقتىڭ قاسى. مينيسترلىكتىڭ مالىمەتىنە سۇيەنسەك, بيىل بىرقاتار جاڭا نىسان بوي كوتەرەدى. شىعارماشىلىق ۇيىرمەلەرى جانە سپورت سەكتسيالارىمەن 3 ميلليوننان استام بالا قامتىلۋى ءتيىس. ازامات ءۇش جىلدان بەرى روبوتوتەحنيكا ۇيىرمەسىنە بارىپ ءجۇر. وسى ارالىقتا 3D ۇلگىدە جوبالاۋ مەن قۇلتەمىر قۇراستىرۋدى مەڭگەرىپ ۇلگەردى. كوماندالاستارىمەن بىرگە تالاي جارىستا توپ جارعان. ازامات ءنابي, روبوتوتەحنيكا ۇيىرمەسىنە قاتىسۋشى: — ءوزىمىزدىڭ روبوتتى ويلاپ تاپتىق. بۇل روبوت وسى ستەنكالارعا پيكسەلدەردى قويماي الىسادى. ودان كەيىن سامولەتيك جىبەرۋ, قيىن تاپسىرمالاردى ورىندايدى. ودان باسقا تاعى ءوزىن-ءوزى كوتەرە الادى. تاعى باسقا فۋنكتسيالارى بار. قازىر ەلدە 1700-دەن استام قوسىمشا ءبىلىم بەرۋ ۇيىمى بار. ونىڭ 27-ءسى وقۋشىلار سارايىندا. بارلىق ۇيىمدى قوسا العاندا, 40 مىڭ شىعارماشىلىق ۇيىرمە مەن سپورت سەكتسياسى جۇمىس ىستەپ تۇر. مۇنداي قوسىمشا بىلىممەن وقۋشىلاردىڭ 81 پروتسەنتى قامتىلعان. ماقپال قاشقىنبەكوۆا, ءال-فارابي اتىنداعى وقۋشىلار سارايى ديرەكتورىنىڭ ورىنباسارى: — وقۋشىلار سارايى بىزدە قالانىڭ ورتالىعىندا ورنالاسسا, شەت جاقتاعى بالالاردى دا قامتۋ ءبىزدىڭ جوسپارىمىزدا بولدى. ول جەرلەردەن دە ءبىز فيليالدار مەن كوميۋنيتي ورتالىقتار اشتىق. مىسالى, قازىر مەكتەپتىڭ جانىنداعى كوميۋنيتي ورتالىق بىزدە التاۋ جانە 2 فيليالىمىز بار. سولاردى قوسقان كەزدە 11 مىڭ بالا بار بىزدە. مۇنداي ۇيىمداردا 25 مىڭ پەداگوگ قىزمەت اتقارادى. ونىڭ 9 مىڭى اۋىلدىق جەرلەردە. سالادا تاعى 2 مىڭ كادر جەتىسپەيدى. سونىمەن قاتار قوسىمشا ءبىلىم بەرۋ جانە ساۋىقتىرۋ نىساندارىن كوبەيتۋ مىندەتى تۇر. بۇل ماسەلەلەردى 2023-2026 جىلدارعا ارنالعان كەشەندى باعدارلاما اياسىندا شەشۋ قاراستىرىلعان. مەرۋەرت مەدەتبەكوۆا, قر وقۋ-اعارتۋ مينيسترلىگىنىڭ دەپارتامەنت ديرەكتورى: — ءتورت جىل ىشىندە بالالارعا ارنالعان 50 ساۋىقتىرۋ لاگەرى سالىنادى, ياعني پايدالانۋعا بەرىلەتىن بولادى. 2024 جىلى 4 وڭىردە 4 بالالار ساۋىقتىرۋ ورتالىعىن اشۋ جوسپارلانسا, 7 وڭىردە 10 قوسىمشا نىسان اشىلادى. اتتەستاتسيادان وتۋدەگى قوسىمشا ءبىلىم بەرۋ پەداگوگتارىنىڭ وزىندىك سالا بويىنشا ەرەكشەلىگىنە قاراي دايىندالعان ارنايى اتتەستاتسيالىق سۇراقتاردان كەلەتىندىگىن نازارلارىڭىزعا جەتكىزەمىز. بيىل بىرقاتار جاڭا ۇيىمنىڭ اشىلۋى ناتيجەسىندە بالالاردىڭ قوسىمشا بىلىممەن قامتىلۋ ۇلەسى 86 پروتسەنتكە جەتەدى. ال قالعان جۇمىستار ەندىگى جىلداردىڭ ەنشىسىنە قالىپ وتىر.
