سوت دەپۋتات تۇرلىحانوۆتىڭ بالاسىن 1,5 جىلعا تۇرمەگە وتىرعىزۋعا شەشىم قابىلدادى

كوللاج: kursiv.media

بوستاندىعى ەكى جىلعا شەكتەلگەن نۇراسىل بولات اقىرى قامالدى. ەندى ول 1,5 جىل بويى جازاسىن تۇرمەدە وتەيدى, دەپ حابارلادى qandastar.kz kursiv.media سىلتەمە جاساپ. الماتى سوتى دەپۋتاتتىڭ بالاسىن 17 ايعا قاۋىپسىزدىگى ورتا كولونياعا جىبەرۋگە شەشىم قابىلدادى.

سوت بارىسىندا نۇراسىلدىڭ 12 قازاندا تاڭعى ساعات 4-تە كاراوكەگە بارعانى انىقتالىپ وتىر. مۇنى ايىپتالۋشى «دوسىمنان باقىلاۋشى-براسلەتتىڭ قۋاتتاعىشىن الۋعا باردىم» دەپ تۇسىندىرگەن.

وسى ۋاقىتقا دەيىن نۇراسىل بولات جازاسىنىڭ التى ايىن وتەپ ۇلگەردى. ەندى ءبىر جىل بەس اي 10 كۇن قالعان ەدى. پروباتسيا قىزمەتىنىڭ وكىلى سوتتان قالعان مەرزىمىن باس بوستاندىعىنان ايىرۋعا اۋىستىرۋدى سۇرادى.

قۋاندىق بيشىمباەۆتىڭ ءىسى بويىنشا تانىلعان ادۆوكات نازكەن قۇسايىنوۆا بولسا, داۋلەت تۇرلىحانوۆتىڭ ۇلىن باس بوستاندىعىنان ايىرماۋدى ءوتىندى.

سوتتالۋشىنىڭ اكەسى داۋلەت تۇرلىحانوۆ «سوت شەشىمىنە ەشقانداي ىقپال ەتپەيمىن, ۇلىم جازاسىن تولىق الۋى ءتيىس» دەپ مالىمدەگەن ەدى.

ۇكىم كەسىلگەنگە دەيىن نۇراسىل بولات اسكەري بولىمدە بولعان. ول جاقتان دا داۋ تۋدىرىپ, قاشىپ كەتكەن ەدى. ونى دەرەۋ بولىمگە قايتارعان. سوت ونى ەركىندىگىنەن ايىرىپ, ءۇي قاماققا العان-دى. بۇعان قاراماستان, الماتى كوشەلەرىندە تۇندە قىدىرعانىن قويماعان ەدى.

توبەلەس ءۇشىن نۇراسىل بولاتتىڭ ەكى جىلعا ەركىندىگى شەكتەلسە دە, ونىڭ الماتىدا ەركىن قىدىرىپ جۇرگەنى, كوڭىل كوتەرۋ مەكەمەلەرىندە وتىرعانى تۋرالى بەينەجازبالار تارادى.

قىلمىستىق اتقارۋ جۇيەسى كوميتەتى تالاپتاردى بۇزعان ءۇشىن ونى بوستاندىعىنان ايىرۋعا كۇش سالاتىنى جونىندە ۋادە بەرگەن.