سوت دەپۋتاتتى اقتادى: بۋكمەكەرلەر بەردەنوۆكە 300 مىڭ تولەيتىن بولدى

فوتو:

استانانىڭ ازاماتتىق ىستەر جونىندەگى اۋدانارالىق سوتى «قازاقستان بۋكمەكەرلىك كەڭسەلەر قاۋىمداستىعىنىڭ» تالاپ ارىزىن قاناعاتتاندىرۋدان باس تارتتى, دەپ جازادى qandastar.kz

«سوت داۋلى ماتەريالداردا بىرلەستىكتىڭ ىسكەرلىك بەدەلىنە نۇقسان كەلتىرەتىن مالىمەتتەر جوق دەگەن قورىتىندىعا كەلدى. سونىمەن قاتار تالاپ ارىزدا بىرلەستىك پەن ونىڭ مۇشەلەرىنە قاتىستى ناقتى فاكتىلەر كورسەتىلمەگەن. فيلولوگيالىق-پسيحولوگيالىق ساراپتاما تەرىس اقپارات بولماعانىن راستادى» دەلىنگەن مالىمەتتە.

سوت شەشىمىنە سايكەس, ەندى بۋكمەكەرلەر بەردەنوۆكە ادۆوكات قىزمەتى ءۇشىن 300 مىڭ تەڭگە تولەۋى ءتيىس.

ايتا كەتەيىك, قازاقستاننىڭ بۋكمەكەرلەر قاۋىمداستىعى Respublica پارتياسىنان سايلانعان ءماجىلىس دەپۋتاتى رۋسلان بەردەنوۆتى سوتقا بەردى.

بۇعان دەيىن اتالعان دەپۋتات قازاقستاندا بۋكمەكەرلىك كەڭسەلەردىڭ جارناماسىنا تىيىم سالۋ ماسەلەسىن كوتەرىپ, بۇل باستاما ويىن بيزنەسى تۋرالى زاڭ ىشىنە ەندى.

«جاۋاپكەر قازاقستان رەسپۋبليكاسى پارلامەنتى ءماجىلىسىنىڭ دەپۋتاتى («Respublica» ساياسي پارتياسى فراكتسياسىنىڭ مۇشەسى) بولا تۇرا, ويىن بيزنەسىن ۇيىمداستىرۋشىلاردىڭ ىسكەرلىك بەدەلىنە نۇقسان كەلتىرەتىن جالعان مالىمەتتەردى تاراتۋعا بىرنەشە رەت جول بەردى. ول تاراتقان اقپاراتتار ويىن بيزنەسى جانە سپورتتىق ءباس تىگۋ سالاسىنداعى رەتتەۋدى قاتاڭداتاتىن زاڭ جوبالارىنىڭ نەگىزىندە پايدالانىلدى», — دەلىنگەن ەدى بۋكمەكەرلىك كەڭسەلەردىڭ بەردەنوۆكە قارسى الماتى قالاسى بوستاندىق اۋداندىق سوتىنا بەرگەن تالاپ ارىزىندا.