Sot depýtatty aqtady: Býkmekerler Berdenovke 300 myń tóleıtin boldy

Foto:

Astananyń azamattyq ister jónindegi aýdanaralyq soty «Qazaqstan býkmekerlik keńseler qaýymdastyǵynyń» talap aryzyn qanaǵattandyrýdan bas tartty, dep jazady qandastar.kz

«Sot daýly materıaldarda birlestiktiń iskerlik bedeline nuqsan keltiretin málimetter joq degen qorytyndyǵa keldi. Sonymen qatar talap aryzda birlestik pen onyń múshelerine qatysty naqty faktiler kórsetilmegen. Fılologııalyq-psıhologııalyq saraptama teris aqparat bolmaǵanyn rastady» delingen málimette.

Sot sheshimine sáıkes, endi býkmekerler Berdenovke advokat qyzmeti úshin 300 myń teńge tóleýi tıis.

Aıta keteıik, Qazaqstannyń býkmekerler qaýymdastyǵy Respublica partııasynan saılanǵan Májilis depýtaty Rýslan Berdenovty sotqa berdi.

Buǵan deıin atalǵan depýtat Qazaqstanda býkmekerlik keńselerdiń jarnamasyna tyıym salý máselesin kóterip, bul bastama Oıyn bıznesi týraly zań ishine endi.

«Jaýapker Qazaqstan Respýblıkasy Parlamenti Májilisiniń depýtaty («Respublica» saıası partııasy frakııasynyń múshesi) bola tura, oıyn bıznesin uıymdastyrýshylardyń iskerlik bedeline nuqsan keltiretin jalǵan málimetterdi taratýǵa birneshe ret jol berdi. Ol taratqan aqparattar oıyn bıznesi jáne sporttyq bás tigý salasyndaǵy retteýdi qatańdatatyn zań jobalarynyń negizinde paıdalanyldy», — delingen edi býkmekerlik keńselerdiń Berdenovke qarsy Almaty qalasy Bostandyq aýdandyq sotyna bergen talap aryzynda.