سوتتى بولعان دەپۋتات كولىك مينيسترلىگىن سىنعا الدى

فوتو: ۆيدەودان سكرين

قازاقستاندا حالىقارالىق جۇك تاسىمالىن جۇزەگە اسىراتىن كولىك قۇرالدارى ءۇشىن مارشرۋت پاراعىن تولتىرۋ تالابى ءالى كۇنگە دەيىن ساقتالعان. بۇل ماسەلەنى ءماجىلىس دەپۋتاتى بولاتبەك ناجمەتدين ۇلى گيپەربورەي ارناسىندا كوتەرىپ, ونى كەڭەستىك كەزەڭنەن قالعان ەسكى ءارى ءتيىمسىز تالاپ دەپ اتادى, دەپ جازدى qandastar.kz.

ەسكى تالاپ – جاڭا كەدەرگىلەر

دەپۋتاتتىڭ ايتۋىنشا, مارشرۋت پاراعى تاسىمالداۋشىلار ءۇشىن شىنايى كەدەرگىگە اينالىپ وتىر. ول مىسال رەتىندە وتاندىق جۇك تاسىمالداۋشىلاردىڭ جاعدايىن كەلتىردى.

«مىسالى, وتاندىق تاسىمالداۋشى الماتىدان بەرلينگە جۇك اپارسا, جولعا شىعاردا مارشرۋت پاراعىن تولتىرادى. ال كەرى قايتار جولدا ونى شەتەلدە وتىرىپ راسىمدەۋى كەرەك», – دەدى ول.

الايدا, قازاقستان اۋماعى ارقىلى وتەتىن شەتەلدىك تاسىمالداۋشىلار (تۇركيا, رەسەي, وزبەكستان, بەلارۋس) بۇل تالاپقا باعىنبايدى. بۇل جاعداي وتاندىق كومپانيالاردى باسەكەلەستىك تۇرعىدان السىرەتىپ, تەڭسىزدىك تۋعىزىپ وتىر.

جاعدايدى كۇردەلەندىرگەن بيۋروكراتيا مەن تاپشىلىق

مارشرۋت پاراعىن راسىمدەۋ كەزىندە جۇرگىزۋشى باعىتى, شىعۋ كۇنى, جۇك سيپاتتاماسى, مەديتسينالىق تەكسەرۋ جانە ديسپەتچەردىڭ قولى سياقتى كوپتەگەن دەرەكتەر كورسەتىلۋى ءتيىس. قۇجاتتىڭ بولماۋى نەمەسە قاتە تولتىرىلۋى تاسىمالداۋشىعا ايىپپۇل سالۋعا نەگىز بولادى.

سونىمەن قاتار, مارشرۋت پاراقتارىنىڭ شەكتەۋلى بولۋى قۇجاتتىڭ نارىقتاعى باعاسىن كۇرت كوتەرىپ جىبەرگەن.

«ناتيجەسىندە قۇنى 1 اەك بولاتىن مارشرۋت پاراعى تاپشىلىققا بايلانىستى جۇزدەگەن ەسە قىمباتتاپ كەتتى», – دەدى دەپۋتات.

جەمقورلىق تاۋەكەلى جانە شەشىلمەگەن ۇسىنىستار

دەپۋتاتتىڭ پىكىرىنشە, بۇل تالاپتار تەك ادىلەتسىزدىك ەمەس, جەمقورلىق تاۋەكەلدەرىنە دە جول اشىپ وتىر. 2023 جىلى بۇل نورمانى جويۋ ۇسىنىلعانمەن, مەملەكەتتىك ورگانداردىڭ قارسى بولۋىنا بايلانىستى شەشىم قابىلدانباعان.

ناجمەتدين ۇلى بۇل باستامانى بيىل كۇزدە قايتا كوتەرمەك.

تسيفرلىق شەشىم — ءتيىمدى جول

ءماجىلىس دەپۋتاتى حالىقارالىق تاجىريبەگە سۇيەنە وتىرىپ, تسيفرلىق مارشرۋت پاراقتارىن ەنگىزۋدى نەمەسە قۇجات راسىمدەۋ ۇدەرىسىن جەڭىلدەتۋدى ۇسىنادى. بۇل رەفورما:

-ارتىق تالاپتاردى جويادى;
-قۇجات اينالىمىن جەڭىلدەتەدى;
-سالاداعى اشىقتىقتى ارتتىرادى.

بۇرىنعى سوت ۇكىمى

ايتا كەتۋ كەرەك, 2001 جىلى دەپۋتات سارىاعاش اۋداندىق سوتىنىڭ ۇكىمىمەن ءۇش جىلعا باس بوستاندىعىنان ايىرىلعان بولاتىن. ول بيلىكتى جانە قىزمەتتىك وكىلەتتىگىن اسىرا پايدالانىپ, رەسمي قۇجاتتار مەن مورلەردى ۇرلاعانى, جويعانى نەمەسە جاسىرىپ قويعانى ءۇشىن ءىستى بولدى.