سپورت كوممەنتاتورى ءوزىن فف-عا پرەزيدەنتتىككە ۇمىتكەر رەتىندە ۇسىندى

فوتو: اشىق دەرەككوز

تانىمال سپورت كوممەنتاتورى ەربول قايىروۆ كۇتپەگەن مالىمدەمە جاسادى, دەپ جازادى qandastar.kz

سپورت كوممەنتاتورى ەربول قايىروۆ ءوزىن قفف-عا پرەزيدەنتتىككە ۇمىتكەر رەتىندە ۇسىندى. بۇل تۋرالى ول الەۋمەتتىك جەلىدەگى پاراقشاسىندا ءبولىستى.

«بۇگىن قازاقستان فۋتبول فەدەراتسياسى رەسمي پرەزيدەنتتىككە ۇمىتكەرلەردى تىركەۋ تۋرالى شەشىم قابىلدادى. سوڭعى كۇنى اقمولا فۋتبول اسسوتسياتسياسىنىڭ اتىنان ءوز كانديداتۋرامدى ۇسىندىم.

ءىس-ساپاردا ءجۇرىپ, بىرنەشە قوڭىراۋلارىڭىزعا جاۋاپ بەرىپ, دايرەكتتە ءبىراز حاتتارىڭىزدى وقىدىم. ارينە, ول جالعان اقپارات ەمەس. بالا كەزىمنەن فۋتبول سالاسىندا ءجۇرىپ, ۇلتتىق قۇرامامىزدى ۇلكەن دودالاردا كورۋدى ارماندايتىنمىن. ەسكى, سەرتيفيكاتسيادان وتپەگەن ستاديوندارىمىزدىڭ ورنىنا قاشان جاڭا ارەنالار سالىنادى دەپ ءجيى ويلادىم?!

ەندى, مىنە, ەر جەتىپ, قفف جانە QFL سترۋكتۋرالارىندا بىرنەشە جىل بويى جۇمىس ىستەپ, تاجىريبە جينادىم. ۋەفا-نىڭ ءبىراز ءىس-شارالارىنا قاتىسىپ, ءبىلىم الدىق. تەك قانا باق سالاسىندا عانا ەمەس, كاسىبي مەن اۋەسقوي فۋتبولدىڭ پروبلەماتيكاسىن زەرتتەپ, جاڭا دەڭگەيگە شىعۋدىڭ جولدارىن بەلگىلەپ قويدىق.

سايلاۋعا از ۋاقىت قالدى, سوندىقتان جاقىن ارادا قازاقستان فۋتبولىنىڭ دامۋ ستراتەگياسى مەن باعدارلاماسىن ۇسىنامىن. ءار ۇمىتكەردىڭ ءوز باعدارلاماسى بار, سوندىقتان تىزىمگە ىلىككەن كەز-كەلگەن ادامنىڭ مۇمكىندىگى مول. تورتەۋىن جەكە تانيمىن جانە دە ارقايسىسىن سىيلايمىن.

«جوعارىدا ءبارى شەشىلدى, نەسىنە قاتىساسىڭ?» دەگەن وي-پىكىرلەرىڭىزدى وقىپ, ەستىپ وتىرمىن. مەن دە ول جايىندا ەستىدىم, جاسىرعىم كەلمەيدى. بىراق ءنومىرى ءبىر سپورت تۇرىنە ءومىرىمدى ارناپ, سەنىمشىل بولعىم كەلەدى. وسى دۇنيەدە دە ادىلەتتىلىك بار دەپ جۇمىسقا كىرىسە بەرەيىك.

«سىزگە قالاي داۋىس بەرە الامىز?» دەگەن سۇراققا وسىلاي جاۋاپ بەرەمىن: سىزدەردىڭ قولداۋلارىڭىزدى سەزىپ, الدارىڭىزدا ماڭگى قارىزدار بولامىن. سەبەبى حالىق قولداۋىنسىز ەشقاشان وسى قادامعا بارماس ەدىم.

داۋىس بەرەتىن قفف مۇشەلەرى, ياعني, ونىڭ قۇرامىنا كىرەتىن ايماقتىق فۋتبول فەدەراتسيالارى مەن اسسوتسياتسيالارى جانە ءارتۇرلى تۇلعالار مەن ۇجىمدار. ولار ءبارىن ادىلەتتى تۇردە شەشەدى دەپ ۇمىتتەنەمىن», – دەدى ەربول قايىروۆ.