جاڭالىقتار
Sport Qory «بارىس» حوككەي كلۋبىنا 2024 جىلى 8,5 ميليارد تەڭگە بەرگەن
فوتو: Stan.kz
قازاقستان رەسپۋبليكاسىنىڭ تۋريزم جانە سپورت يندۋسترياسىن قولداۋ قورى – Sport Qory 2024 جىلعى قىزمەتى بويىنشا قارجىلىق ەسەبىن جاريالادى, دەپ جازدى qandastar.kz
بۇل تۋرالى Stan.kz اقپارات اگەنتتىگى “دياديا ۆانيا” Telegram ارناسىنا سىلتەمە جاساپ حابارلايدى.
قۇجاتقا سايكەس, وتكەن جىلى قوردىڭ جالپى كىرىسى 32,263 ميلليارد تەڭگەنى (شامامەن 63,2 ميلليون اقش دوللارى) قۇراعان.
بۇل سومانىڭ نەگىزگى بولىگى – 29 ميلليارد تەڭگە – دەمەۋشىلىك كومەك رەتىندە تۇسكەن. تاعى 1,881 ميلليارد تەڭگە – لوتەرەيا وپەراتورىنىڭ اۋدارىمدارى, ال 1,312 ميلليارد تەڭگە – بوس قاراجاتتى ۋاقىتشا ورنالاستىرۋدان تۇسكەن تابىس بولدى.
اتالعان قاراجاتتىڭ باسىم بولىگى – 30,8 ميلليارد تەڭگە – قازاقستاندىق سپورتتى قولداۋعا باعىتتالدى. ونىڭ ىشىندە 21,6 ميلليارد تەڭگە (42,3 ميلليون دوللار) كاسىبي سپورتقا جۇمسالدى, بۇل جالپى شىعىننىڭ 70 پايىزىنا جۋىق. قالعان 9,2 ميلليارد تەڭگە (18 ميلليون دوللار) بۇقارالىق جانە ينكليۋزيۆتى سپورتقا, سونداي-اق سپورت فەدەراتسيالارى مەن ينفراقۇرىلىمىن دامىتۋعا ءبولىندى.
2024 جىلى ەڭ كوپ قارجىلىق قولداۋعا يە بولعان كاسىبي سپورت كلۋبتارى:
– «بارىس» حوككەي كلۋبى – 8,5 ميلليارد تەڭگە (16,64 ميلليون دوللار)
– XDS Astana Team ۆەلوكومانداسى – 6 ميلليارد تەڭگە (11,75 ميلليون دوللار)
– «استانا» فۋتبول كلۋبى – 5,3 ميلليارد تەڭگە (10,38 ميلليون دوللار)
– «استانا» باسكەتبول كلۋبى – 1,8 ميلليارد تەڭگە (3,52 ميلليون دوللار)
سونداي-اق فۋتزالدان «قايرات» كلۋبى 992,6 ميلليون تەڭگە (شامامەن 2 ميلليون دوللار) كولەمىندە قولداۋ الدى.
وليمپيادالىق سپورت تۇرلەرىنە 5,5 ميلليارد تەڭگەگە جۋىق قارجى ءبولىندى. بۇل باعىتتا تەننيس, ۆولەيبول, شاڭعى جارىستارى, سۋ سپورتى, كۇرەس, بوكس, دزيۋدو, اتۋ سپورتى جانە تاعى باسقا ۇلتتىق فەدەراتسيالار قارجىلاندىرىلدى.
ۇلتتىق سپورت تۇرلەرىنە, اتاپ ايتقاندا قازاق كۇرەسى, كوكپار, توعىزقۇمالاق, جامبى اتۋ سەكىلدى باعىتتارعا 1,3 ميلليارد تەڭگە ءبولىندى.
ينكليۋزيۆتى سپورتقا 548 ميلليون تەڭگە باعىتتالدى. بۇل قاراجات پاراليمپيادالىق جانە سۋردليمپيادالىق كوميتەتتەرگە, پارادزيۋدو, پاراۆولەيبول, پاراۆەلوسپورت, ەرەكشە قاجەتتىلىگى بار جاندارعا ارنالعان حوككەي جانە باسقا دا سپورت تۇرلەرىنە ءبولىندى.
وليمپيادالىق ەمەس سپورت تۇرلەرىن قولداۋعا 477 ميلليون تەڭگە ءبولىندى. قارجىلاندىرىلعاندار قاتارىندا مما سپورتشىلارى, شاحماتشى ءبيبىسارا اساۋباەۆا, UFC فايتەرى شاۆكات راحمونوۆ بار.
سپورت ينفراقۇرىلىمىن جابدىقتاۋ مەن باسقا دا قوسالقى جوبالارعا 198 ميلليون تەڭگە, ال بۇقارالىق سپورتقا 180 ميلليون تەڭگە ءبولىندى. قولداۋ العان جوبالاردىڭ ىشىندە BAQ League, قازاقستان اۋەسقوي فۋتبول ليگاسى, سۋ سپورتى بويىنشا استانا فەدەراتسياسى جانە ت.ب. بار.
جالپى العاندا, 2024 جىلى قور قىزمەتىنىڭ باستى باعىتى – كاسىبي سپورت كلۋبتارىن قولداۋ بولدى. اسىرەسە حوككەي, ۆەلوسپورت جانە فۋتبول سالالارى باسىمدىققا يە. قوردىڭ نەگىزگى قارجىلىق كوزى – «سامۇرىق-قازىنا» ۇلتتىق ءال-اۋقات قورى, ول دەمەۋشىلىك كومەكتىڭ 95 پايىزىنان استامىن قامتاماسىز ەتكەن.
