سپورت زالىنان گورى مەشىت كوپ سالامىز – قر ەڭبەك سىڭىرگەن باپكەرى

كسرو-نىڭ سپورت شەبەرى, قر ەڭبەك سىڭىرگەن باپكەرى – امالبەك تشانوۆ سپورت سالاسىنداعى وزەكتى ماسەلەنىڭ ءبىرىن كوتەردى, دەپ حابارلايدى Skifnews.kz اقپارات پورتالى.

كوپ اۋىلدا سپورتزالدارى جەتىسپەيتىنى بارلىعىمىزعا بەلگىلى. ال كەي اۋىلداردا شىنىعاتىن زال مۇلدەم جوق دەسە دە بولادى. باپكەردىڭ ايتۋىنشا, سپورت نىساندارىن سالۋدىڭ قيىندىعى جوق.

«قۇرىلىسشى رەتىندە ايتسام, قازىر سپورت نىساندارىن سالۋدىڭ ەش قيىندىعى جوق. ول كوپ شىعىندى دا تالاپ ەتپەيدى. ءبىز قازىر سپورت زالىنا قاراعاندا, مەشىتتى كوپ سالامىز. بىزدە «كىم كوپ مەشىت سالسا, سول پەيىشكە بارادى» دەگەن ۋاعىزدار جۇرەدى. كىمنىڭ قاشان كەتەتىنىن كىم بىلەدى?! مەن مەشىتتەردىڭ سالىنۋىنا قارسى ەمەسپىن, بىراق قازىرگى كەزدە جاستاردى سپورتقا كوبىرەك تارتۋ كەرەك. سپورتقا بەيىمدەلگەن جاستاردان جامان مىنەز شىقپايدى. سپورتشى بولۋ ءۇشىن ءاربىر اۋىلعا ءبىزدىڭ بالالار بەيىم كەلەتىن بوكس, كۇرەس, ۆولەيبولعا ارنالعان سپورت زالدارىن سالۋعا بولادى. وسىنىڭ ءبارىن مىندەتتەيتىن ۇلكەن ءبىر مەملەكەتتىك تياناقتى باعدارلاما بولۋى كەرەك. مەملەكەتتىڭ قازىر وعان مۇمكىندىگى بار. سپورتشىلاردىڭ 95%-ى – شالعايداعى اۋىلدىڭ, تۇرمىسى ناشار وتباسىلاردان شىققان بالالار. بىزدەگى بالالار 15000 تەڭگە شاكىرتاقى الاتىن بولسا, سونى اتا-اناسىنا جىبەرەدى. قازاقستاننىڭ سپورتتان بولاشاعى بار ەكەنىنە ەشقانداي كۇمان جوق, قازاقتىڭ نەبىر تالانتتى بالالارى بار. سپورتتان بولەك, بىلىمگە دە كۇش سالۋىمىز كەرەك. سەبەبى اۋىلدان كەلگەن بالالاردىڭ كوبىنىڭ ساۋاتى وتە ناشار. ەگەر, فاميلياسىن قاتە جازادى دەسەم, سەنبەيتىن بولارسىز…», – دەدى ول ءوزىنىڭ سۇحباتىندا.