ستراندجا-2025: قازاقستان قۇراماسىنىڭ 4 بوكسشىسى فينالدا

بۇگىن بولگاريا استاناسىندا ءوتىپ جاتقان بوكستان حالىقارالىق «ستراندجا كۋبوگىندا» ەرلەر اراسىندا جارتىلاي فينالدىق باسەكە ءوتىپ جاتىر, دەپ حابارلايدى qandastar.kz

جەكپە-جەكتەر باستالماي تۇرىپ, اسا اۋىر سالماقتا ەل نامىسىن قورعايتىن ايبەك ورالباي ايقاسسىز اتالعان ءتۋرنيردىڭ فينالىنا جولداما الدى. وتانداسىمىزدىڭ قارسىلاسى جارتىلاي فينالدا شارشى الاڭعا شىعۋدان باس تارتقان. وسىلايشا ايبەك فينالعا ەش قينالماي شىقتى.

سونىمەن قاتار 51 كەلى سالماقتا سىنعا تۇسكەن تاعى ءبىر قازاقستاندىق بوكسشى دانيال ءسابيت تە فينالعا ءوتتى. ول بۇگىن ازەربايجان بوكسشىسى نيجات حۋسەينوۆپەن جۇدىرىقتاسقان بولاتىن. ناتيجەسىندە جەكپە-جەك ەكىنشى راۋندتا دانيالدىڭ جەڭىسىمەن اياقتالدى.

63.5 كەلى سالماقتا ەرتۋعان زەينۋللينوۆ تا اقتىق سىنعا ءوتتى. وتانداسىمىز جارتىلاي فينالدا رينگ قوجايىنىن 5:0 ەسەبىمەن جەڭدى.

وسى سالماقتا تاعى ءبىر قازاقستاندىق بوكسشى مۇحاممەدسابىر بازارباي ۇلى دا فينالعا شىقتى. ول بۇگىن يرلانديالىق بوكسشىدان 4:1 ەسەبىمەن باسىم ءتۇستى.

ەندى اتالعان ءتۋرنيردىڭ فينالىندا 63,5 كەلى سالماق دارەجەسىندە قوس قازاقستان سپورتشى ءوزارا التىن جۇلدەنى ساراپقا سالادى.