«Stress alǵan»: aqyn Sara Toqtamysova áriptesteri týraly aıtty

Aıtysker Sara Toqtamysova «DINARA SATZHAN / DINARA SATJAN» youtube-arnasynda aqyndardyń aıtysqa qatysqannan aýrý bolyp jatqanyn aıtty, dep habarlaıdy Qandastar.kz.

Onyń aıtýynsha, aıtys óneri adamdy kúızeliske túsiredi.

«Aıtys degen óte qıyn óner. 20 mınýttyń ishinde óziń sýyrypsalasyń, qarsylasyń ne aıtatynyn bilmeısiń, sen oǵan jaýap berýiń kerek. Aıtystyń belgili taqyryby bolady, ol týraly aıtýyń kerek. Onyń ústine sen ártis bolýyń kerek.

Qazir aqyn aǵa-apalarymyz qantpen, qan qysymymen aýyrady. Onyń bári neden? Onyń bári jas kúninde aıtysqa qatysyp, stress alǵannan. Meniń aıtystyń aldynda kózim qyp-qyzyl bolyp ketetin. Sózdiń soqqysyna daıyn bolý úshin bar oıyń sonda bolady. Seni qarsylasyń aıamaıdy», — dedi ol.

Aqyn aıtys óneri qoǵamda óziniń tıisti baǵasyn ala almaı júr dep esepteıdi.