جاڭالىقتار
سۋ باسۋ قاۋپىنە اكەلەدى»: سينوپتيكتەر ەسكەرتۋ جاسادى
قازگيدرومەت» رمك وكىلى ناۋرىزدىڭ سوڭىنا دەيىن وڭىرلەردە قار قارقىندى تۇردە ەريتىنىن ەسكەرتىپ, سۋ باسۋ قاۋپى ءتونىپ تۇرعانىن حابارلادى.
قازگيدرومەت» رمك باس ديرەكتورىنىڭ ءبىرىنشى ورىنباسارى سەرىك سايروۆ بريفينگتە ەلىمىزدە قار جامىلعىسىنىڭ اۋدانى 72 پايىزدان 66 پايىزعا دەيىن ازايعانىن ايتتى. 16-19 ناۋرىز ارالىعىندا كۇن رايى جاۋىن-شاشىنسىز بولىپ, تەمپەراتۋرا جوعارىلايدى دەپ بولجانىپ وتىر.
ناۋرىزدىڭ ءۇشىنشى ونكۇندىگىندە باتىس وڭىرلەردى ەسەپتەمەگەندە, قازاقستاننىڭ باسىم بولىگىندە قار, بۇرقاسىن, ەكپىندى جەل كۇتىلەدى. «قازگيدرومە» ماماندارىنىڭ باعالاۋى بويىنشا ناۋرىزدىڭ سوڭىنا قاراي اۋا تەمپەراتۋراسىنىڭ فونى كوتەرىلىپ, بۇل قاردىڭ قارقىندى ەرۋىنە جانە سۋ باسۋ قاۋپىنە اكەلەدى.
سونىمەن قاتار رەسەيگە شەكارالاس ايماقتارعا, اتاپ ايتقاندا, جايىق وزەنى مەن ونىڭ سالالارىنا, توبىلدىڭ الاپتارىنا ەرەكشە نازار اۋدارۋ قاجەت. قازىر ورىنبور جانە چەليابى وبلىستارىندا, سونداي-اق باشقۇرتستان رەسپۋبليكاسىندا جينالعان قار كولەمىنە بايلانىستى قولايسىز سۋ تاسقىنى جاعدايى قالىپتاستى», – دەدى سايروۆ. ونىڭ ايتۋىنشا, گيدرولوگيالىق مونيتورينگ 377 گيدرولوگيالىق بەكەتتە جۇرگىزىلەدى.
