سۋ كەتكەن سوڭ قاپتاردى تۇگەل جيناماساق, ەكولوگيالىق اپات بولۋى مۇمكىن

«قازىر قارعىن سۋدىڭ بەتى قايتقانىمەن, قاۋىپ سەيىلگەن جوق. ءتىپتى, قاۋىپتىڭ كوكەسى ءالى الدا. ونىڭ ۇستىنە, تاسقىن سۋ تالاي بىلىقتىڭ بەتىن اشتى. قامسىزدىقتىڭ كەسىرىنەن تال قارماۋعا شامامىز كەلمەي قالدى. تەك كوڭىلگە مەدەت بولاتىنى, سول باياعى حالىقتىڭ اۋىزبىرشىلىگى. وعان دالەل, اتىرداۋداعى ميالى دەگەن الاقانداي عانا اۋىل. مىنە, وسى اۋىل تۇرعىندارى تايلى-تۇياعى قالماي تاسقىنعا قارسى بوگەت تۇرعىزىپ, اياداي عانا اۋىلدى امان الىپ قالدى. ىرگەسىنەن تامشى وتكىزبەگەن اۋىل قازىر تاپ-تۇيناقتاي, تاپ-تازا. بۇل نەنىڭ ارقاسى? اۋىزبىرلىكتىڭ ارقاسى! ال, ساۋىت-سايمانى مەن تەحنيكاسى ساقاداي ساي وتىرعان كەيبىر وبلىس ورتالىقتارى ايدىڭ-كۇننىڭ امانىندا تاسقىننىڭ استىندا قالدى. بۇل نەنى كورسەتەدى? بۇل قامسىزدىقتى, سالعىرتتىقتى, نەمقۇرايلىلىقتى, جاۋاپكەرشىلىك پەن جاناشىرلىقتىڭ جوقتىعىن كورسەتتى», – دەدى دەپۋتات.

ماقسات تولىقباي تازالىق ماسەلەسىن كوتەردى.

«سەبەبى, ەلگە تاسقىنمەن بىرگە ەندى توپالاڭ كەلەدى. ويتكەنى, قارعىن سۋدان قورعانۋ ءۇشىن مىڭداعان قاپ مەن پاكەتتەردەن بوگەت تۇرعىزدىق. پوليەتيلەن كلەنكالاردى پايدالاندىق. ەندى سۋ كەتكەن سوڭ وسى قاپتاردى تۇگىن قالدىرماي, تۇگەل جيناپ الماساق, ەرتەڭ ەكولوگيالىق اپاتقا تاپ بولامىز. ونىڭ ۇستىنە ساي-سالادان كەلگەن سۋ قانشاما كۇل-قوقىس, قالدىق, اڭ-قۇس پەن مالدىڭ ولەكسەلەرىن اعىزىپ اكەتتى. وسى جەمتىكتەردى جەدەل ارادا زالالسىزداندىرماساق, جاڭاعى مەن ايتىپ وتىرعان توپالاڭ قۇرعىر ءتۇرلى دەرت پەن اۋرۋدى تاراتۋى  مۇمكىن», – دەپ جالعاستىردى ول.

ماجىلىسمەن ەل بويىنشا «تازا قازاقستان» تازالىق ايلىعى ءوتىپ جاتقانىن تىلگە تيەك ەتتى.

«باتىس ەلدەرىن ايتپاي-اق قويايىن, ىرگەمىزدە وتىرعان كورشى وزبەك اعايىنداردىڭ تازالىعىنا تاڭداي قاعىپ, تاڭ قالامىز. ال مۇنداي مۇنتازداي تازالىق وزىنەن-ءوزى جاسالمايدى. وعان جوعارىداعى ميالى اۋىل حالقىنىڭ تىرلىگى دالەل», – دەدى ماقسات تولىقباي.

ءماجىلىس دەپۋتاتى ۇكىمەتتەن قوعامدا تازالىق ساقتاۋ مادەنيەتىن قالىپتاستىرۋعا باعىتتالعان كەشەندى باعدارلاما ازىرلەۋدى ۇسىندى. سونىمەن قاتار ورتا مەكتەپ وقۋشىلارى اراسىندا «ەكولوگيالىق سانا» اتتى اعارتۋشىلىق سىنىپ ساعاتتارىنىڭ وتكىزىلۋىن قولدادى.