Sý ketken soń qaptardy túgel jınamasaq, ekologııalyq apat bolýy múmkin

«Qazir qarǵyn sýdyń beti qaıtqanymen, qaýip seıilgen joq. Tipti, qaýiptiń kókesi áli alda. Onyń ústine, tasqyn sý talaı bylyqtyń betin ashty. Qamsyzdyqtyń kesirinen tal qarmaýǵa shamamyz kelmeı qaldy. Tek kóńilge medet bolatyny, sol baıaǵy halyqtyń aýyzbirshiligi. Oǵan dálel, Atyrdaýdaǵy Mııaly degen alaqandaı ǵana aýyl. Mine, osy aýyl turǵyndary taıly-tuıaǵy qalmaı tasqynǵa qarsy bóget turǵyzyp, aıadaı ǵana aýyldy aman alyp qaldy. Irgesinen tamshy ótkizbegen aýyl qazir tap-tuınaqtaı, tap-taza. Bul neniń arqasy? Aýyzbirliktiń arqasy! Al, saýyt-saımany men tehnıkasy saqadaı saı otyrǵan keıbir oblys ortalyqtary aıdyń-kúnniń amanynda tasqynnyń astynda qaldy. Bul neni kórsetedi? Bul qamsyzdyqty, salǵyrttyqty, nemquraılylyqty, jaýapkershilik pen janashyrlyqtyń joqtyǵyn kórsetti», – dedi depýtat.

Maqsat Tolyqbaı tazalyq máselesin kóterdi.

«Sebebi, elge tasqynmen birge endi topalań keledi. О́ıtkeni, qarǵyn sýdan qorǵaný úshin myńdaǵan qap men paketterden bóget turǵyzdyq. Polıetılen klenkalardy paıdalandyq. Endi sý ketken soń osy qaptardy túgin qaldyrmaı, túgel jınap almasaq, erteń ekologııalyq apatqa tap bolamyz. Onyń ústine saı-saladan kelgen sý qanshama kúl-qoqys, qaldyq, ań-qus pen maldyń ólekselerin aǵyzyp áketti. Osy jemtikterdi jedel arada zalalsyzdandyrmasaq, jańaǵy men aıtyp otyrǵan topalań qurǵyr túrli dert pen aýrýdy taratýy  múmkin», – dep jalǵastyrdy ol.

Májilismen el boıynsha «Taza Qazaqstan» tazalyq aılyǵy ótip jatqanyn tilge tıek etti.

«Batys elderin aıtpaı-aq qoıaıyn, irgemizde otyrǵan kórshi ózbek aǵaıyndardyń tazalyǵyna tańdaı qaǵyp, tań qalamyz. Al mundaı muntazdaı tazalyq ózinen-ózi jasalmaıdy. Oǵan joǵarydaǵy Mııaly aýyl halqynyń tirligi dálel», – dedi Maqsat Tolyqbaı.

Májilis depýtaty Úkimetten qoǵamda tazalyq saqtaý mádenıetin qalyptastyrýǵa baǵyttalǵan keshendi baǵdarlama ázirleýdi usyndy. Sonymen qatar orta mektep oqýshylary arasynda «Ekologııalyq sana» atty aǵartýshylyq synyp saǵattarynyń ótkizilýin qoldady.