سۋ تاسقىنى. قۇلسارى قۇرساۋدا قالا ما?

اتىراۋ وبلىسىندا جەم وزەنىنىڭ دەڭگەيى كوتەرىلىپ, ارناسىنان اسىپ جاتىر. وسىعان بايلانىستى جىلىوي اۋدانىندا جاعداي كۇردەلەندى. ءبىز قازىر جىلىوي اۋدانىنىڭ ورتالىعى قۇلسارى قالاسىندامىز.

66 مىڭعا جۋىق تۇرعىنى بار قۇلسارى قالاسىمەن قۇرساي وزەگى وتەدى. جەم وزەنىنە بيىل مول سۋ كەلىپ, قازىر قۇرساي وزەگىنىڭ ارناسى تولدى. ءتىپتى كەي جەردە ارناسىنان اسىپ كەتىپ جاتىر. سوندىقتان اۋداندىق شتاب 2-اۋىل جانە 3-اۋىل ىقشاماۋداندارىنىڭ تۇرعىندارىن ەۆاكۋاتسيالاۋعا شەشىم شىعارعان. قازىر 7 ەۆاكۋاتسيالىق ورىن ءازىر. باتىستەحينۆەست مەكەمەسىنىڭ اۆتوبۋستارى تۇرعىنداردى قاۋىپسىز جەرگە تاسىمالداپ جاتىر. قالا تۇرعىندارى, توتەنشە جاعدايلار ءبولىمىنىڭ قىزمەتكەرلەرى, ساربازدار جاعا بەكىتۋ جۇمىستارىمەن ۇزدىكسىز, كۇندىز-ءتۇنى اينالىسىپ جاتىر.

جەرگىلىكتى كاسىپكەرلەر دە جۇمىسشىلارعا ىستىق تاماق تاسىپ, قول ۇشىن سوزىپ جاتىر. ساقتىقتا قورلىق جوق قازىر, مىنە اۋداندىق اكىمدىكتىڭ الدىندا دا اۆتوبۋستار قويىلعان. تۇرعىنداردى قاۋىپسىز ايماققا كوشىرۋگە ءازىر. تەڭىز كەن ورنىندا جۇمىس ىستەيتىن اۋدان تۇرعىندارى 5 كۇنگە اقىسى ساقتالاتىن دەمالىسقا جىبەرىلىپ, قازىر جاعا بەكىتۋ جۇمىستارىنا جۇمىلدىرىلدى. اۋدان بويىنشا 16 قاۋىپتى ايماق بەلگىلەنگەن. ول جەرلەردە بوگەتتەردى نىعايتۋ جۇمىستارى توقتاۋسىز ءجۇرىپ جاتىر. قۇرساي وزەگىنە سۋ باسۋ قاۋپى تونگەندىكتەن بوگەتتەردى نىعايتۋ جۇمىستارىنا پوليتسيا, توتەنشە جاعدايلار قىزمەتى جانە اسكەري بولىمنەن 321 قىزمەتكەر جۇمىلعان. اۋىل تۇرعىندارى مەن ەرىكتىلەردەن 4030 ادام كومەككە كەلدى. 121 تەحنيكا جۇمىس ىستەپ جاتىر. اۋىل تۇرعىندارى جانە توتەنشە جاعدايلار قىزمەتىنىڭ كۇشىمەن 7 مىڭعا تارتا باس مال قاۋىپسىز جەرگە كوشىرىلدى.