سۋ تاسقىنى. شىمكەنت دايىندىق ۇستىندە

شىمكەنتتە سۋ تاسقىنىن الدىن الۋ جۇمىستارى كۇشەيتىلدى. سينوپتيكتەردىڭ بولجامىنشا, ءساۋىر ايى جاۋىن-شاشىندى بولادى.

وسىعان وراي توتەنشە جاعدايلار دەپارتامەنتىنىڭ وكىلدەرى دايىندىقتى پىسىقتاپ, وزەندەر مەن كانالداردى باقىلاۋعا شىقتى. ال جايلى ورتانى دامىتۋ باسقارماسىنىڭ ماماندارى يرريگاتسيالىق جۇيەلەردىڭ جاي-كۇيىن تەكسەرىپ ءجۇر. شىمكەنتتە ءساۋىر ايىنىڭ العاشقى ونكۇندىگىندە جاۋىن-شاشىن مول جاۋدى. توتەنشە جاعدايلار دەپارتامەنتىنىڭ وكىلدەرى 4 وزەن مەن 9-دان اسا كانالعا تىكۇشاقپەن بارلاۋ جاسادى. سۋ دەڭگەيى كوتەرىلگەنىمەن, تاسقىن قاۋپى جوق دەيدى ولار.

يريسمات ماحمۋدوۆ, قالالىق تجد ءبولىم باستىعى: — تۇركىستان وبلىسىنىڭ تاۋلى ايماقتارىندا قاردىڭ قورى بۇگىنگى تاڭدا 29 سم. بۇل بويىنشا نورما 64 سم. جالپى سۋ تاسقىنى جاعدايلارى تۇراقتى باقىلاۋدا. سۋ تاسقىنى كەزىندە جەكە قۇرام, ازاماتتىق قورعاۋدىڭ كىشى جۇيەسى جوعارى دايىندىققا كەلتىرىلگەن. قالا اۋماعىنداعى سۋ ساقتاۋعا ارنالعان بادام, توعىس, تەكەسۋ, اقجار قويمالارىندا سۋ دەڭگەيى قالىپتى. شامامەن 89 پايىز. ال ابدۋللاباد, بازارقاقپا تۇرعىن الاپتارىندا ساي-سالادان اققان سۋدان قاۋىپ بار. سوندىقتان جەرگىلىكتى اكىمدىك وكىلدەرى ارنايى كانالدار قازىپ, تاسقىنعا توسقىن بولار جۇمىستاردى كۇشەيتتى. مەيرامبەك ورازىمبەت, قالالىق جايلى ورتانى دامىتۋ باسقارماسىنىڭ ءبولىم باسشىسى: — سۋ تاسقىنى كەزەڭىنە دايىندىق بويىنشا كانالدار جانە وزەن ارنالارىن تۇزەتۋ مەن مەحانيكالاۋ, يرريگاتسيالىق جۇيەلەردى تازالاۋ جۇمىستارى جۇرگىزىلدى. ال ۇزىندىعى 45 شاقىرىم بولاتىن بادام وزەنىنىڭ بويىندا قاۋىپتى 6 ۋچاسكە بار. جىلدان جىلعا وزەن ارناسى كەڭەيىپ, جۇزدەگەن ءۇيدىڭ اۋلاسى تارىلىپ بارادى. سوندىقتان وزەن جاعالاۋىن نىعايتۋ جۇمىستارى باستالدى. بۇدان بىلاي بادام وزەنىنىڭ بويىندا جىل بويى قۇرىلىس جۇرەدى. مەردىگەرلەر اساۋ اعىستىڭ ارناسىن بۇرىپ, جاعالاۋىن بەتونمەن بەكىتۋگە كىرىستى. ايتپەگەندە جاعالاي ورنالاسقان تۇرعىن ءۇي سەكتورىن سۋ باسۋ قاۋپى كۇشەيىپ بارادى. اۋقىمدى جوباعا جەرگىلىكتى بيۋدجەتتەن 5 ميللياردتان استام قاراجات ءبولىندى.

جوسپار بويىنشا ماياتاس, توعىس, قىزىلجار, يگىلىك جانە تاۋەلسىزدىككە 20 جىل تۇرعىن الابىنان وتەتىن وزەننىڭ 9 شاقىرىمى جوندەلەدى. دەسە دە قۇرىلىسقا قۇبىلمالى اۋا-رايى قولبايلاۋ بولىپ تۇر. قاپبار ەسەنوۆ, مەردىگەر مەكەمە وكىلى: — قازىرگى كەزدە ءبىر ايدىڭ 15 كۇنىندە جۇمىس ىستەسەك, 15 كۇنىندە جۇمىس ىستەي الماي جاتىرمىز. ويتكەنى جاڭبىر بولعان ۋاقىتتا ەشقانداي تەحنيكا جۇرە الماي قالادى. اعىسى وتە قاتتى. 1 ساعاتتىڭ ىشىندە كوتەرىلەدى دە 1 ساعاتتان كەيىن قايتا تومەن تۇسەدى. سونىڭ سالدارى كورسەتىپ جاتىر. كوتەرىپ قويعان دامبىمىزدىڭ ءوزى شايىلىپ كەتىپ جاتىر. قايتادان قالپىنا كەلتىرىپ, ىستەپ جاتىرمىز. سونىمەن قاتار, قالاداعى اقجار سۋ قويماسى دا كۇردەلى جوندەۋدى قاجەت ەتەدى. 80-جىلدارى سالىنعان گيدروتەحنيكالىق نىساننىڭ جاعدايى كوڭىل كونشىتپەيدى. ساراپشىلاردىڭ زەرتتەۋىنەن كەيىن سۋ قويماسىنا وسىنداي باعا بەرىلدى. ازىرگە بيۋدجەتتەن قۇرىلىستىڭ جوبالاۋ قۇجاتتاماسىنا قاراجات ءبولىنىپ وتىر.