جاڭالىقتار
سۋ تاسقىنىنان كەيىن قازاقستاندىق 202 وتباسى قيراعان باسپاناسىنىڭ ورنىنا تۇرعىن ءۇي مەن پاتەر الدى
قر ۇكىمەتى مەملەكەت باسشىسى قاسىم-جومارت توقاەۆتىڭ تاپسىرماسى بويىنشا بيىلعى كوكتەمدە بولعان اۋقىمدى سۋ تاسقىنىنان زارداپ شەككەن ازاماتتارعا كەلتىرىلگەن شىعىندى وتەۋ جۇمىستارىن جالعاستىرىپ جاتىر.
ۇكىمەتتىڭ ءباسپاسوز قىزمەتى حابارلاعانداي, بۇگىنگى تاڭدا 24 641 وتباسى 9,3 ملرد تەڭگەدەن استام سوماعا 100 اەك مولشەرىندە بىرجولعى تولەم الدى. مال شىعىنى ءۇشىن بەرىلگەن مەملەكەتتىك كومەك كولەمى 1,3 ملرد تەڭگەدەن استى.
17 مامىرداعى جاعداي بويىنشا بۇگىندە 202 وتباسى قيراعان باسپاناسىنىڭ ورنىنا تۇرعىن ءۇي مەن پاتەرگە يە بولدى. اقتوبە, باتىس قازاقستان, سولتۇستىك قازاقستان جانە پاۆلودار وبلىستارىندا زارداپ شەككەن ازاماتتارعا ارنالعان 658 جاڭا ءۇي سالىنىپ جاتىر. سونىمەن قاتار 596 وتباسىنا 878 ملن تەڭگەدەن استام سوماعا تۇرعىن ءۇيدى جوندەۋگە جانە قالپىنا كەلتىرۋگە وتەماقى تولەندى. زارداپ شەككەن وڭىرلەردە بارلىعى 10 740 تۇرعىن ءۇي تەكسەرىلىپ, 8 168 نىسان بويىنشا باعالاۋ جۇرگىزىلدى.
كەلتىرىلگەن زياندى وتەۋ جۇمىستارى جالعاسىپ جاتىر جانە ۇكىمەتتىڭ قاتاڭ باقىلاۋىندا. قر پرەزيدەنتىنىڭ تاپسىرماسى بويىنشا زارداپ شەككەن ازاماتتاردىڭ بارلىعىنا جان-جاقتى كومەك پەن قولداۋ كورسەتىلەدى.
ايتا كەتەيىك, ۇكىمەت ريددەردىڭ جىلۋ جەلىلەرىن جوندەۋ ءۇشىن رەزەرۆتەن 2,4 ملرد تەڭگەدەن استام قاراجات ءبولدى.
