جاڭالىقتار
سۋ تاسقىنىنان كەلتىرىلگەن زالالدى باعالاۋ جونىندەگى كوميسسيا اقتوبەلىكتەردەن ءوتىنىم قابىلداي باستادى
مەملەكەت باسشىسىنىڭ تاپسىرماسى بويىنشا قر پرەمەر-ءمينيسترىنىڭ ورىنباسارى سەرىك جۇمانعارين اقتوبە وبلىسىنا باردى.
وبلىس ورتالىعىندا ۆيتسە-پرەمەر ەلەك وزەنىنىڭ جاعاسىندا ورنالاسقان سۋ باسقان «ەكو» جانە «كوكتەم» باۋ-باقشا ۇجىمدارىنىڭ تۇرعىندارىمەن كەزدەستى. جينالعانداردى قىزىقتىرعان باستى ماسەلە ماتەريالدىق شىعىننىڭ قالاي وتەلەتىنى بولدى. سەرىك جۇمانعارين ادامداردى سۋ تاسقىنىنان بولعان بارلىق ماتەريالدىق شىعىن وتەلەتىنىنە سەندىردى.
اقتوبە وبلىسىنىڭ اكىمى اسحات شاحاروۆ وڭىردە ارنايى كوميسسيا قۇرىلعانىن, ونىڭ مۇشەلەرى زارداپ شەككەن تۇرعىنداردىڭ ءتيىستى وتىنىشتەرىن قاراپ جاتقانىن ايتتى. وبلىستا 689 ساياجاي ءۇيى سۋ استىندا قالىپ وتىر.
سونىمەن قاتار سەرىك جۇمانعارين اقتوبە سۋ قويماسىن تەكسەردى. سۋ تاسقىنى كەزەڭىندە جوبالىق قۋاتى 245 ملن تەكشە مەتر بولا تۇرا, سۋ قويماسىنا 485 ملن تەكشە مەتر ەرىگەن قار سۋى جينالدى.
جەدەل شتاب وتىرىسىندا جۇمىس ساپارىنىڭ قورىتىندىلارى مەن ينسپەكتسيا ناتيجەلەرى تالقىلاندى. سونداي-اق سۋ تاسقىنىنا قارسى ءىس-قيمىل بويىنشا ناقتى شارالار جوسپارى انىقتالدى.
