«سۋفيزم – قازاقتىڭ قانىندا اعىپ جاتقان ءبىلىم»: تانىمال اقىن يسلامعا بەت بۇرعانىن ايتتى

فوتو: malim.kz

اقىن, جازۋشى اقبەرەن ەلگەزەك ىشىمدىك ءىشۋدى قويىپ, دىنگە بەت بۇرعانىن ايتتى. ونىڭ سوزىنشە, ول يسلام ءدىنىن تەرەڭدەپ زەرتتەي باستاعان, سوپىلىق يسلامدى قابىلداعان, دەپ حابارلايدى qandastar.kz  Skifnews.kz اقپارات پورتالىنا سىلتەمە جاساپ. 

بۇل تۋرالى اقىن Dulat Tastekey YouTube ارناسىنا بەرگەن سۇحباتىندا ايتىپ بەردى.

«سۋفيزم بۇل — يسلام. كوبىسى ونى شيرك, ادامعا تابىنۋع ارۋاققا سىيىنۋ دەپ ويلايدى. ولاي ەمەس, ول ءبىلىمسىز ادامداردىڭ ويى. يسلامدا ءۇش تاعان بار: يمان, يسلام, يحسان. يمان مەن يسلامدى بىلەدى, ال يحساندى ەشكىم بىلمەيدى. يحسان دەگەن سۋفيزم. يمان مەن يسلامدا جۇرگەن ادامعا قاراعاندا كەمەل دەڭگەيگە جەتۋ. بۇل — عىلىم. سوپىلىقتا بەس ۋاقىت نامازىمدا وتەدىم, قۇداي ريزا شىعار دەپ جۇرە بەرمەيسىڭ, يسلامدى زەرتتەيتىن ادامعا اينالاسىڭ. سۋفيزم قازاقتىڭ قانىندا اعىپ جاتقان ءبىلىم. قوجا احمەت ياسساۋيدەن باستاپ تارقاتاتىن بولساق, قانشا عاسىر ءوتتى. قاي اۋىلعا بارساڭ دا, اۋليە كوپ. قازاقتىڭ دالاسىندا شاشىراپ جاتقان بۇل نە دەگەن اۋليە?! بۇنىڭ ءبارى سۋفيزم ۇستانىپ, يسلامدى ۇستانعان ادامنان الدەقايدا رۋحاني بيىك دەڭگەيگە جەتكەن ادامدار. ولار قۇدايدىڭ سۇيىكتىلەرى», — دەيدى ول.

اقىن سوپىلاردىڭ اللا الدىنداعى دارەجەسى تۋرالى دا ءسوز قوزعادى.

«اششى سۋمەن ات قۇيرىعىن كەسىسىپ, نامازعا جىعىلدىم. سودان كەيىن يسلام دەگەن نە, زەرتتەپ كورەيىنشى دەدىم. بۇل — مەنىڭ اقىلمەن تانىعان دۇنيەم. مەن مەشىتكە بارىپ, بىرەۋدىڭ ۋاعىزىن تىڭداپ كەلگەن جوقپىن. ناماز وقىپ, بىرەۋدى الداپ, قىلمىسقا بارا بەرۋى مۇمكىن. ال, سوپىلىقتا وندايعا بارمايدى. يسلامنىڭ ءۇشىنشى تاعانى, كەمەل بولعاندىقتان سەن ىشكى جان دۇنيەڭدە قىلۋەتكە كىرەسىڭ, وڭاشالاناسىڭ. اللا تاعالا سالعان تىيىمدارعا جولامايسىڭ, ۇنەمى زىكىردە جۇرەسىڭ. قايدا جۇرسەڭ دە اللانى ويلاپ جۇرەسىڭ. سوپى ادام جامان بولدى دەگەن ءسوز جوق», — دەيدى اقىن.