سۋعا باتىپ كەتكەنشە قاراپ تۇرعان: 7 سىنىپ وقۋشىسىن ولتىرگەن جوعارى سىنىپ بالالارىنا قانداي جازا بەرىلەدى?

فوتو: اشىق دەرەككوز

اتىراۋ وبلىسىندا بەلگىسىز جاعدايدا سۋعا باتىپ قازا تاپقان 13 جاسار بالانىڭ تۋىستارى تەرگەۋدىڭ ءادىل جۇرگىزىلۋىن تالاپ ەتەدى, – دەپ حابارلايدى  qandastar.kz  ۇلتتىق پورتالى “ينفورمبيۋرو” جاڭالىقتار قىزمەتىنە سىلتەمە جاساپ.

مارقۇمنىڭ جاقىندارى قىلمىستىق ءىستىڭ بابىن اۋىستىرىپ, كۇدىكتىلەردى قاماۋ كەرەك دەپ ەسەپتەيدى.

قايعىلى وقيعا تامىز ايىندا جايىق وزەنىنىڭ جاعاسىندا بولعان. مارقۇمنىڭ تۋىستارى مەرلان سىنىپتاستارىمەن كەتىپ, سول كۇيى ورالماعانىن ايتادى. سوزدەرىنشە, مەرلان سانانى ۇلكەن سىنىپتىڭ بالالارى جايىق وزەنىنە يتەرىپ جىبەرگەن. انارگۇل قاسانتاەۆا بالاما قاستاندىق جاساعان ادامدار جازاسىز قالىپ وتىر دەيدى. ونىڭ ۇستىنە تەرگەۋشىلەردىڭ قايتا-قايتا اۋىسۋى كوڭىلىنە كۇدىك ۇيالاتىپتى.

“بالامدى شاقىرىپ الىپ كەتكەندەر جايباراقات مۋزىكا تىڭداپ وتىردى. ولاردان سۇراسام, موني سۋعا باتتى دەپ ايتتى. ولار ءسوزدى بۇرمالاپ سوسىن, ۇيگە كەتتى دەي سالدى. جايىق جاعاسىنا بارسام بالامنىڭ كيىمدەرى جاتىر. ەگىزدىڭ سىڭارى بولسا جانۇزاق سۋعا يتەرىپ جىبەردى دەدى. ايقايلاعان بالام قۇتقارىڭدار دەپ, قۇتقارماي قاراپ تۇرعان. باتىپ كەتكەنىنشە”, – دەيدى انارگۇل قاسانتاەۆا.

7-سىنىپ وقىعان ۇلىمىزدىڭ جۇزە المايتىنىن ءارى كوزىنىڭ ناشار كورەتىنىن بىلگەن ۇلكەن سىنىپتاعى وقۋشىلار ونى قاساقانا يتەرىپ جىبەردى دەپ وتىر. بۇل اقپاراتتى كەي سىنىپتاستارى دا راستاعان كورىنەدى.

”ول بالا يتەرگەندە سۋعا باتىپ كەتۋ مۇمكىن ەكەندىگىن ءبىلىپ تۇرىپ, بىراق تا سونى ىستەپ تۇر. سوندىقتان بۇل جاناما پيعىلمەن 99-باپپەن دارەجەلەۋگە جاتادى دەپ ويلايمىن. سەبەبى جاناما پيعىل دەگەندى پروكۋراتۋرا دا, تەرگەۋ ورگاندارى دا ۇمىتىپ كەتتى. جاعادا تۇرعان مەرلاندى ارتىنان كەلىپ يتەرىپ جىبەرگەن, سۋعا ءتۇسىرىپ جىبەرگەن. بەلىنەن يتەرىپ, ول تۋرالى كورسەتىپ وتىرعان بالالار بار ءىس بويىنشا. 4-5 بالا بار”, – دەيدى جابىرلەنۋشى تاراپتىڭ ادۆوكاتى ماقسات تولەنباەۆ.

ادۆوكات بۇل جايتقا الىمجەتتىك سەبەپ دەگەن پىكىردە. سوندىقتان مەكتەپ مۇعالىمدەرى مەن جوعارى سىنىپ وقۋشىلارىنان دا جاۋاپ الۋ كەرەك دەيدى. ال پوليتسيا تەرگەۋ ءالى اياقتالماعان دەپ قىسقا قايىردى. قىلمىستىق ىستە كۇدىكتىلەردىڭ بار-جوعى دا ازىرگە بەلگىسىز.

ء“جاسوسپىرىمنىڭ ولىمىنە قاتىستى قازىرگى ۋاقىتتا قر قك104 بابىنا سايكەس قىلمىستىق ءىس تەرگەلۋدە. ياعني «ابايسىزدا قازاعا ۇشىراتۋ» دەرەگى بويىنشا سوت-مەديتسينالىق ساراپتاماسى تاعايىندالدى. وزگە اقپارات تەرگەۋ مۇددەسىنە سايكەس جاريالاۋعا جاتپايدى”, – دەيدى اتىراۋ وبلىستىق پوليتسيا دەپارتامەنتى اقپاراتتىق ساياسات ءبولىمىنىڭ ينسپەكتورى دينا ماقسوتوۆا.