“سۋيتسيدكە يتەرمەلەيدى”: ىشكى ىستەر مينيسترلىگى تەلەفونداعى قاۋىپتى ويىندار تۋرالى ءتۇسىندىردى

فوتو: pixabay.com

الەۋمەتتىك جەلىلەردە كىشكەنتاي بالانىڭ Schoolboy Runaway ويىنى تۋرالى اكەسىنە ايتىپ جاتقان ۆيدەو تارادى. ۆيدەوعا قاتىستى ىشكى ىستەر مينيسترلىگى پىكىر ءبىلدىردى. بۇل تۋرالى qandastar.kz  Stan.kz اقپارات اگەنتتىگىنە سىلتەمە جاساپ حابارلايدى.

استانا تۇرعىنى ءوزىنىڭ بالاسىنىڭ جانە ونىڭ دوستارىنىڭ ويناپ جۇرگەن ويىنىن كورسەتۋ ارقىلى قالعان اتا-انالارعا ەسكەرتۋ جاساماق بولعان.

ۆيدەودا بالا اۋلاداعى دوستارىنىڭ اتتارىن اتاپ, ويىننىڭ شارتى بويىنشا قانداي تاپسىرمالاردى ورىنداۋ كەرەك ەكەنىن ايتادى.

ء«بىز ويىننىڭ ىشىندە تاپسىرمالاردى ورىندايمىز. مىسالى ۇيدەن قاشىپ دوستارىڭا بارۋ, شوپكە سەكىرۋ, سىمداردىڭ ۇستىمەن جۇگىرۋ, بالىقشىعا بارۋ, كولگە باتىپ كەتۋ دەگەن سياقتى», – دەيدى بالا.

ونىڭ ايتۋىنشا, تاپسىرمالاردى ورىنداعانى ءۇشىن ولارعا ۇپايلار بەرىلەدى, ولاردى دوستار ءبىر-بىرىنە ماقتانىشپەن كورسەتەدى.

بالانىڭ اكەسى ويىنعا قاتىستى ەسكەرتۋ جاسادى.

ء«بىزدىڭ اۋلانىڭ بارلىق بالالارى وسى ويىندى وينايتىن بولىپ شىقتى. بۇل سۋيتسيدكە اكەلەتىن ويىن سياقتى. بالالاردى ۇيدەن قاشۋعا, شاتىردان سەكىرۋگە, كولگە باتىپ كەتۋگە يتەرمەلەيدى. مەن بالامنىڭ تەلەفونىنان وسىنداي نارسەلەردى بايقادىم. بارلىق اتا-انالاردان بالالارىڭىزبەن شۇعىل اڭگىمە وتكىزۋدى سۇرايمىن, بۇل ءازىل ەمەس», – دەيدى ەر ادام.

ىشكى ىستەر مينيسترلىگىنىڭ رەسمي وكىلى شىڭعىس الەكەشەۆ ۆيدەوعا قاتىستى تۇسىنىكتەمە بەردى. ونىڭ ايتۋىنشا, مۇنداي ويىندار بالالاردى ءوز-وزىنە قول جۇمساۋعا يتەرمەلەمەيدى.

«سوڭعى ۋاقىتتا قازاقستاندىق مەسسەندجەرلەردە قاۋىپتى ويىندار تۋرالى اقپارات تارالۋدا. مۇنداي ويىندار تىكەلەي سۋيتسيدكە يتەرمەلەمەيدى. الايدا بالالارعا ۇيدەن قاشۋدى, اتا-اناسىنا باعيانباۋدى ۇيرەتەدى. بۇل بالانىڭ پسيحولوگياسىنا اسەر ەتەتىنى انىق», – دەپ اتاپ ءوتتى الەكەشەۆ ىشكى ىستەر مينيسترلىگىنىڭ بريفينگىندە.

وسىعان بايلانىستى ءبولىم كامەلەتكە تولماعانداردىڭ اتا-انالارى مەن زاڭدى وكىلدەرىنە بالالاردى تاربيەلەۋ مەن قاداعالاۋدىڭ ماڭىزدىلىعىن ەسكە سالادى.

مينيسترلىكتىڭ رەسمي وكىلى قازاقستانداعى بالالار اراسىنداعى ءسۋيتسيدتىڭ نەگىزگى سەبەپتەرىن دە اتادى. ولاردىڭ اراسىندا ءوزىن جالعىز سەزىنۋ, قارجىلىق جاعدايدىڭ ناشار بولۋى, اتا-انالارمەن جانە تۋىستارىمەن اراداعى قاتىناستىڭ دۇرىس بولماۋى, وقۋداعى ماسەلەلەر, اتا-اناسىنىڭ اجىراسۋى, جاقىن ادامنىڭ قايتىس بولۋى, جازادان قورقۋ جانە ت.ب سەبەپتەر بار.

ءوز-وزىنە قول جۇمساۋدىڭ ناقتى سەبەپتەرى تەك تەرگەۋدەن كەيىن بەلگىلى بولاتىنىن ايتادى ول.

«قۇرمەتتى اتا-انالار, ءبىز ءسىزدى بالالارىڭىزدىڭ مىنەز-قۇلقى مەن ەموتسيونالدىق جاعدايىن مۇقيات باقىلاۋعا شاقىرامىز, ولارمەن اشىق ديالوگ جۇرگىزىڭىز. بالاعا سىزدىڭ قولداۋىڭىز بەن تۇسىنىستىك تانىتۋىڭىز وتە ماڭىزدى», – دەدى شىڭعىس الەكەشەۆ.

ەسكە سالساق, وسىعان دەيىن الماتىدا ەكى وقۋشى قىز توعىزىنشى قاباتتان قۇلاپ مەرت بولدى. كەيىن وقۋشى قىزداردىڭ جاقىندارى ولاردى بۇعان نە يتەرمەلەگەنىن ايتقان ەدى.