سىبايلاس جەمقورلىققا قارسى كۇرەس تەتىكتەرى تالقىلاندى

سەناتور جاننا اسانوۆا قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنىڭ قىزمەتكەرلەرىمەن كەزدەستى,-دەپ حابارلايدى Qandastar.kz

قوعامدىق قابىلداۋ بولمەسىندەگى اڭگىمە بارىسىندا سىبايلاس جەمقورلىققا قارسى كۇرەستىڭ جاڭا تەتىكتەرىن ىزدەۋ ماسەلەلەرى باستى تاقىرىپ بولدى.

كەزدەسۋگە دەپارتامەنت باسشىلىعى, سىبايلاس جەمقورلىققا قارسى قىزمەتتىڭ جەتەكشى ماماندارى, ۇكىمەتتىك ەمەس ۇيىمداردىڭ, ساراپتامالىق قوعامداستىقتىڭ وكىلدەرى جانە الماتى قالالىق ءماسليحاتىنىڭ دەپۋتاتتارى قاتىستى.

جاننا اسانوۆا كەزدەسۋگە قاتىسۋشىلارعا «سىبايلاس جەمقورلىققا قارسى كۇرەستىڭ جاڭا تەتىكتەرى» تاقىرىبى بويىنشا ودم جۇمىس توبى قىزمەتىنىڭ ارالىق ناتيجەلەرى تۋرالى ايتىپ بەردى. تانىستىرۋ بارىسىندا سىبايلاس جەمقورلىق دەڭگەيىن تومەندەتۋگە باعىتتالعان نەگىزگى باستامالار مەن ادىستەمەلەر, سونداي-اق ولاردى ەلىمىزدىڭ ءتۇرلى وڭىرلەرىندە تابىستى ىسكە اسىرۋدىڭ مىسالدارى ايتىلدى, — دەلىنگەن اقپاراتتا.

شاراعا قاتىسۋشىلار سىبايلاس جەمقورلىققا قارسى كۇرەستە مەملەكەتتىك ورگانداردىڭ اشىقتىعى مەن ەسەپتىلىگىن ارتتىرۋعا مۇمكىندىك بەرەتىن جاڭا تەحنولوگيالار مەن تسيفرلىق قۇرالداردى ەنگىزۋ كەلەشەگىن تالقىلادى. جاننا اسانوۆا سىبايلاس جەمقورلىققا قارسى ءىس-قيمىلعا ازاماتتىق قوعامدى تارتۋدىڭ ماڭىزدىلىعىن جانە سىبايلاس جەمقورلىققا قارسى ءىس-قيمىل ادىستەرى تۋرالى حالىقتىڭ حاباردارلىعىن ارتتىرۋ ءۇشىن اقپاراتتىق جۇمىس جۇرگىزۋ قاجەتتىگىن اتاپ ءوتتى.

كەزدەسۋ قورىتىندىسى بويىنشا ءتيىستى ودم بويىنشا جۇمىس توبى مەن الماتىنىڭ سىبايلاس جەمقورلىققا قارسى قىزمەتى اراسىندا تالدامالىق جانە اقپاراتتىق-ادىستەمەلىك سپەكتر ماسەلەلەرى بويىنشا ءوزارا تىعىز ءىس-قيمىل ورناتۋ تۋرالى ۋاعدالاستىققا قول جەتكىزىلدى. وسىلايشا, تاياۋ بولاشاقتا مامانداردىڭ بىلىكتىلىگىن ارتتىرۋ ماقساتىندا بىرلەسكەن ءىس-شارالار, سەمينارلار مەن ترەنينگتەر وتكىزۋ جوسپارلانىپ وتىر.