سىعىر كوز دەدى: رەسەيدە ۇلتىنا بايلانىستى كەمسىتىلگەن 17 جاستاعى سپورتشى قىز وزىنە قول جۇمسادى

فوتو: cheposhka

رەسەيدە 17 جاستاعى سپورتشى ۇلتىنا بايلانىستى كەمسىتىلگەنى تۋرالى جازبا قالدىرىپ, ءوز-وزىنە قول جۇمسادى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

وقيعاعا بايلانىستى قىلمىستىق ءىس قوزعالدى.

ەكى جىل بۇرىن التاي رەسپۋبليكاسىنان نوۆوسىبىرگە كوشىپ كەلگەن سامبوشى كسەنيا چەپونوۆانىڭ دەنەسىن باپكەرلەرى 17 تامىز كۇنى تاپقان.

سپورتشى تەلەگرام كانالىندا بلوگ جۇرگىزىپ كەلگەن, مارقۇم ءوزىنىڭ «سوڭعى جازباسىن» وسى بلوگتا جاريالاپتى.

«مەن جاقسى ادام ەمەس شىعارمىن, بىراق جامان ادام ەمەسپىن, مەنىڭ كىنام نە ەكەنىن تۇسىنبەيمىن? تۋعاننان كوزىمنىڭ سىعىر بولعانىنان با, الدە تەرىمنىڭ ءتۇسى قاراتورى بولعانى ءۇشىن بە? كەيبىرەۋلەر ۇلتىمدى ازىلگە اينالدىرعانعا دەيىن مەن ءوز ۇلتىمنان ەشقاشان ۇيالعان ەمەسپىن», — دەلىنگەن سپورتشىنىڭ سوڭعى جازباسىندا.

چەپونوۆانىڭ تۋىستارى مەن دوستارى “وكنو» جوباسىنا بەرگەن سۇحباتىندا مەكتەپتە وقۋشىلاردىڭ كسەنيانى “سىعىر كوز» جانە «قارا ءناسىلدى» دەپ مازاق قىلعاندارىن ايتتى. وتباسى مازاق ەتۋدى باستاعان سول مەكتەپتە وقيتىن سامبو باپكەرىنىڭ قىزى دەپ ەسەپتەيدى.

تەرگەۋ كوميتەتى چەپونوۆانىڭ ولىمىنە قاتىستى قىلمىستىق ءىس قوزعادى. سپورتشىنىڭ تۋىسىنىڭ ايتۋىنشا, ءىس «سۋيتسيدكە يتەرمەلەۋ” بابى بويىنشا قوزعالعان.

ەسكە سالساق, بۇعان دەيىن 19 جاستاعى قازاقستاندىقتىڭ قۇمار ويىننىڭ كەسىرىنەن وزىنە قول جۇمساعانى تۋرالى جازعان ەدىك.