«Syılyq týraly sóz qozǵaıyn degen oıym bolǵan joq»: Tanymal aqyn ózin synaǵan baspagerge jaýap berdi

Foto:Stan.kz

Aqyn Hanbıbi Esenqaraqyzy qaraly jıynda ne sebepti syılyq týraly sóz qozǵaǵanyn túsindirdi, dep jazdy qandastar.kz

Bul týraly Stan.kz aqparat agenttigi habarlaıdy.

Aıta keteıik, baspager Baqytjan Buqarbaı “Dýlat Isabekovtiń asynda sóz alǵan Hanbıbi Esenqaraqyzy marqumnyń artynda qalǵan balalaryna kóńil aıtýdyń ornyna, óziniń memlekettik syılyq ala almaı júrgenin alǵa tartty. Bul sózi tym ádepsiz kórindi” dep jazǵan edi baspager. Aqyn óz kezeginde jaýap berdi.

«Erikti aýyzǵa, bórikti bas sııady. Syılaıtyn adamym bolǵandyqtan, Dýlat aǵanyń qaraly jıynyna qatysý úshin, jasymnyń egdeligine qaramaı, tańǵy bestegi ushaqpen baryp, tún jamylyp úıime jetken edim. Al tańerteń Facebook-ta meni kinálaǵan jazbany kórip, qaıran qaldym», – dep jazdy aqyn.

Ádebıet ókili jıynda Dýlat Isabekovtiń otbasyna kóńil aıtyp, týǵan-týystarymen qushaqtasyp kóriskenin, biraq sol sátte Baqytjan Buqarbaıdyń bolmaǵanyn atap ótti.

«Syılyq týraly sóz qozǵaıyn degen oıym bolǵan joq. Tek Dýlat aǵanyń prozaǵa kelýime úlken áser etkenin aıtqym keldi. Memlekettik syılyq komıssııasynyń keıbir músheleri meniń prozaǵa qandaı qatysym bar dep suraǵanda, sol jerde otyrǵandarǵa shyndyqty jetkizýdi jón kórdim. Sypsyń-sypsyń ósek aıtpaı, sol aýylda júrip aıanbaı eńbek ettim. Alǵan nagradalarym sol eńbektiń óteýi. Aq úı jaǵalap, tamyr – tanys izdeý – meniń tabıǵatyma jat nárse. Tyrnaq astynan kir izdegen Baqytjanǵa jol-jónekeı qosyla ketkender tabylypty», – dep túsindirdi aqyn.

Eske salaıyq, Dýlat Isabekov 82 jasynda dúnıeden ozǵan edi.