«سىرانىڭ اقشاسىن تولەمەي قويعان»: كوز جۇمعان 16 جاستاعى ءجاسوسپىرىم ءولىمىنىڭ ءمان-جايى انىقتالدى

الماتى وبلىسىندا ءجاسوسپىرىمنىڭ ءولىمى تەرگەلۋدە. 16 جاسار بالا جاپپاي توبەلەس كەزىندە كوز جۇمدى.

جانجال جىگىتتىڭ وتباسى جالعا الاتىن دۇكەندە باستالعان. تۋىستارىنىڭ ايتۋىنشا, ساۋدا نۇكتەسىنە كەلگەن ساتىپ الۋشى سىرا الىپ, اقشاسىن تولەۋدەن باس تارتقان. وسىدان كەيىن توبەلەس باستالىپتى. بۇل تۋرالى كتك تەلەارناسى مالىمدەدى.

تالعارداعى ۇيلەردىڭ ءبىرىنىڭ تۇرعىندارى سۇمدىق وقيعانىڭ كۋاگەرى بولدى.  ساۋدا نۇكتەسىن بولاتتىڭ وتباسى جالعا الاتىن بولعان. قايعىلى تۇندە اۋىسىمدا ءۇيدىڭ وتاعاسى جۇمىس ىستەگەن. تۋىستارىنىڭ ايتۋىنشا, ەر ادام ساۋدا نۇكتەسىنە ءبىر قۇتى سىرا ىشۋگە كەلگەن, بىراق ول ءۇشىن اقشا تولەگىسى كەلمەگەن ءسويتىپ ۇرىس-كەرىس باستالعان.

16 جاستاعى شەرزات پەن ونىڭ اعاسى اكەسىن جاقتاپ, كليەنتتەن كەتۋىن وتىنگەن. بىراق ونىڭ ورنىنا جانجال شىعارعان ازامات دوستارىنا قوڭىراۋ شالىپ, دۇكەنگە ءۇش كولىك كەلەدى.

“ ۇلىم ماعان قوڭىراۋ شالىپ, قازىر اكەسى مەن اعاسىن ۇرىپ-سوعاتىنىن ايتتى. بىردەن دۇكەنگە جۇگىردىم. بىراق مەن جەتكەنشە ۇلىم مەن كۇيەۋىمنىڭ اعاسىن ۇرىپ-سوعىپ ۇلگەرىپتى. كۇيەۋى پىشاق ۇستاعان ادامدى ولاردان الىپ كەتكەن. ونى قارۋلانعان دەپ قورىققان. بىراق ول جەردەگىلەردىڭ بارلىعىندا پىشاق, ءتىپتى مىلتىق بولدى. ۇلىمدى كوز الىمدا كوكالا قويداي ەتىپ ساباعان. ونىڭ قانسىراپ جاتقانىن كوردىم”, – دەيدى جىگىتتىڭ اناسى گۇلبارا بيشەمبيەۆا.

قايتىس بولعان ءجاسوسپىرىمنىڭ اناسى ۇلى مەن قايىن اعاسىن ۇرىپ-سوققان سوڭ كۇدىكتىلەردىڭ ولاردى پىشاقتاعانىن ايتادى. تۋىستارى زارداپ شەككەندەردى اۋرۋحاناعا اپارعان. بىراق ول جەردە ءجاسوسپىرىم كوز جۇمادى.

“شەرزاتتىڭ اكەسى تەك كليەنتتىڭ تاۋار ءۇشىن اقشا تولەۋىن قالاعان. بۇل دۇرىس قوي. كەلگەن ادام نە سەبەپتى ولارعا ءتيىسىپ, توبەلەسىپ, بىرەۋلەرگە قوڭىراۋ شالا باستادى? 15-20-دان كەم ەمەس ادام كەلدى. ولاردىڭ اراسىندا ءۇش-ءتورت قىز بولدى. بارلىعى جاس, بىراق وزدەرىن اڭدار سياقتى ۇستادى. ءتىپتى مىلتىقتارى مەن پىشاقتارى بولعان”, – دەيدى كوز جۇمعان جىگىتتىڭ تاعى ءبىر تۋىسى كۇلاش ريموۆا.

بۇگىن وقۋشىنىڭ دەنەسى ۇيگە جەتكىزىلدى. ولاردىڭ وتباسىندا بەس بالا بولعان دەيدى. شەرزات ەڭ ۇلكەنى. سوندىقتان كىشىلەرگە ۇلگى بولۋدى ارمانداعان. 10-سىنىپتا وقىپ جۇرگەن ءجاسوسپىرىم اسكەري ۋچيليششەگە تۇسۋگە دايىندالىپتى.

“وتە مەيىرىمدى جانە اشىق-جارقىن بالا ەدى. ەشقاشان ەشكىممەن قاقتىعىسقان ەمەس. بارلىعىنا قۇرمەتپەن قارايتىن. تۇندە ول توبەلەسكىسى كەلمەگەنىنە سەنىمدىمىن. فيزيكالىق تۇرعىدان مىقتى بولعان جانە كەز كەلگەن ادامعا قارسى تۇرا الاتىن. بىراق ولاردىڭ سانى تىم كوپ بولدى”, – دەيدى تۋىسى باقىت ريموۆا.

تۋىستارى كۇدىكتىلەر جەرگىلىكتى تۇرعىندار دەيدى. ولاردىڭ بارلىعى ءبىر اۋىلدا تۇرعان, بىراق جەكە تانىس بولماعان. توبەلەسكە قاتىسۋشىلاردىڭ ءبارى ۇستالدى.  “كىسى ءولتىرۋ فاكتىسى بويىنشا پوليتسيا قىلمىستىق ءىس قوزعادى. وقيعانىڭ بارلىق قاتىسۋشىلارى ۇستالىپ, ۋاقىتشا ۇستاۋ يزولياتورىنا قامالدى. قىلمىستىق ءىستى تەرگەۋ وبلىستىق پوليتسيا دەپارتامەنتى باسشىلىعىنىڭ ەرەكشە باقىلاۋىندا”, – دەيدى الماتى وبلىسى پد باستىعىنىڭ ورىنباسارى مالىك قابدۋاليەۆ.

توبەلەسكە قاتىسقان شەرزاتتىڭ اعاسىنا ءۇش رەت پىشاق سالعانى بەلگىلى بولدى. قازىر ەر ادام اۋرۋحانادا ەم قابىلداپ جاتىر.