«تابىلعان جوق»: ريددەردە قاتتى اعىس كۆادروتسيكلدى جۇرگىزۋشىسىمەن بىرگە الىپ كەتكەن

شىعىس قازاقستان وبلىسىندا وزەن اعىنى كۆادروتسيكلمەن وتكەلدەن وتپەك بولعان ەر ادامدى اعىزىپ اكەتتى, دەپ حابارلايدى Qandastar.kz

قۇتقارۋشىلار ىزدەستىرۋ جۇمىستارىن جۇرگىزىپ جاتىر. 31 تامىز كۇنى ەكى ەر ادام كۆادروتسيكلمەن كەدروۆكا وزەنىنەن وتپەك بولعان. الايدا نوسەر جاڭبىردان كەيىن سۋ دەڭگەيى كوتەرىلىپ, قايعىلى جاعدايعا سەبەپ بولعان.

بەلگىلى بولعانداي, جولاۋشى امان قالعان, ال جۇرگىزۋشىنى وزەن كۆادروتسيكلىمەن بىرگە اعىزىپ اكەتكەن. وقيعا تۋرالى قۇتقارۋشىلارعا حابارلانعان. كەشە ولار ىزدەستىرۋ جۇمىستارىنا كىرىستى, بىراق ءالى كۇنگە دەيىن ەر ادام تابىلعان جوق.

“ريددەر قالاسىندا كەدروۆكا جانە ءۇلبى وزەندەرىندە قۇتقارۋشىلار 1961 جىلى تۋعان ەر ادامدى ىزدەستىرۋدە. ول كۆادروتسيكلمەن كەدروۆكا وزەنىنەن وتپەك بولىپ, اعىسپەن بىرگە كەتكەن. ىزدەۋ جۇمىستارىنا وتىمدىلىگى جوعارى تەحنيكا, دروندار, ءجۇزۋ قۇرالدارى جۇمىلدىرىلعان. الايدا وزەندەردىڭ قاتتى اعىسى مەن قيىن وتكەلدى جەرلەر ىزدەۋدى قيىنداتىپ وتىر”, – دەپ حابارلادى شىعىس قازاقستان وبلىسى تج دەپارتامەنتىنىڭ ءباسپاسوز قىزمەتى.