«تابىسىنان سالىق تولەۋى كەرەك»: ساكەن مايعازيەۆتىڭ اقىلى «ونلاين تويى» كوميتەتتىڭ نازارىن اۋداردى

بەلگىلى ءانشى ساكەن مايعازيەۆتىڭ ۇلىنىڭ ۇيلەنۋ تويىن ونلاين فورماتتا اقىلى تۇردە كورسەتۋى سالىق زاڭناماسىنا سايكەس تابىس كوزى رەتىندە قاراستىرىلادى. بۇل تۋرالى مەملەكەتتىك كىرىستەر كوميتەتى مالىمدەدى, دەپ حابارلايدى Qandastar.kz اقپارات پورتالى.

بۇل قازاق قوعامىندا العاش رەت وتكىزىلگەن اقىلى ونلاين-توي رەتىندە تىركەلدى.

«قارالىپ وتىرعان جاعدايدا ونلاين-ۇيلەنۋ تويىنا قاتىسۋ ءۇشىن 1380 تەڭگە كولەمىندە اقى الۋ تابىس تابۋعا باعىتتالعان كاسىپكەرلىك قىزمەت بولىپ سانالادى. ەگەر شارانى ۇيىمداستىرۋشى جەكە كاسىپكەر نەمەسە زاڭدى تۇلعا رەتىندە تىركەلسە, ول العان تابىسىن دەكلاراتسيالاپ, جەكە تابىس سالىعىن تولەۋگە مىندەتتى», – دەلىنگەن كوميتەت تۇسىندىرمەسىندە.

ياعني, بۇل تابىس زاڭ جۇزىندە سالىق سالىناتىن كىرىس رەتىندە قارالادى.

ەسكە سالايىق, تانىمال ءانشى ساكەن مايعازيەۆ كوپشىلىكتى ۇلى ادىلەت پەن كەلىنى ءاديانىڭ ۇيلەنۋ تويىن ونلاين كورۋگە شاقىردى.

ۇيىمداستىرۋشىلاردىڭ مالىمەتىنشە, ادىلەت پەن ءاديانىڭ قۋانىشىنا ارنايى Telegram-ارناسى اشىلعان. تويدى ۇيىندە وتىرىپ-اق تاماشالاعىسى كەلەتىن جۇرت وسى ارناعا تىركەلىپ, مەرەكەنىڭ ەڭ جارقىن ساتتەرىن كورە الادى.

« ۇلىمىزدىڭ ۇيلەنۋ تويىن سىزدەرمەن ءبولىسۋ ءۇشىن ارنايى جابىق Telegram-ارناسىن اشتىق. بۇل ارنادا تويدىڭ ەرەكشە ءارى قىزىقتى ساتتەرىن ونلاين تاماشالاۋعا مۇمكىندىك بار. قۋانىشىمىزعا ورتاقتاسىپ, ونلاين تويىمىزدىڭ قادىرلى قوناعى بولۋعا شاقىرامىز», – دەلىنگەن حابارلامادا.

Telegram-ارناعا تىركەلىپ, تويدىڭ ونلاين قوناعى بولعىسى كەلگەندەرگە 1380 تەڭگە تولەۋ قاجەت.