«Tabytqa jatyp, janazamdy tyńdadym»: Psıholog Quralaı qıyn terapııadan ótkenin aıtty

Tanymal psıholog Quralaı hanym eń kúrdeli terapııadan ótkenin aıtyp berdi, dep jazdy Qandastar.kz 

Psıhologııa mamany inisiniń qazasynan keıin kúızeliske túskenin jýrnalıst Janar Baısemizdiń podkastynda aıtty.

“2020 jyly karantın kezinde anam qatty aýyrdy. Qaskeleń qalasynda aýyryp jatty. Tynys alý apparaty joq edi. Sodan bastap anam men baýyrymdy Astanaǵa kóshýge úgittedim. Qasymda bolǵanyn qaladym. Baýyrymnyń búkil malyn sattyrdym. Astanadan úı salýǵa kóndirdim. Balalary Astanada oqyp jatqan, solardy syltaýratyp kóshirip ákeldim. Biraq aǵam kóp uzamaı, júregi toqtap, qaıtys boldy. Jeńgemniń betine qaraı almaı qaldym. Aǵamnyń ólimine ózimdi kináladym. О́ıtkeni, men jyly ornyn sýytyp, qonys aýdarýǵa májbúrledim. Týǵan jerin tastap, dostary men aralasatyn ortasyn tastap keldi. Janazasynda 500-ge jýyq adam kelip, kóńil aıtty. Sodan keıin ózim qatty kúızeldim”, – dedi Quralaı hanym.

Psıhologtyń sózinshe, kúızelisten keıin terapııadan ótken.

“Baýyrymnyń qazasynan keıin ózimdi joǵaltyp aldym. Dúnıe tóńkerilip ketkendeı boldy. Ustazdarymnyń aldyna baryp, psıhologııadaǵy eń qıyn terapııalardyń biri tabyt terapııasyna qatystym. Qulaǵyma qulaqqappen janaza namazyn tyńdap jattym. Menimen birge 5-6 adam qatysty. Eshkimge mundaı terapııa jasaýǵa keńes bermeımin. Kádimgi tabytqa túsip, tiri qýyrshaqqa aınalasyń. Bárin oısha jasaısyń. Joldasymmen qoshtastym. 4 qyzymdy amanattap tapsyrdym. Bir kezde anamnyń “Kýsıa” degen sózin estidim. Sol kezde atyp turdym. О́ıtkeni men anama ǵana kerek ekenmin. Úsh aı buryn balasynan aıyryldy. Endi qyzynan aıyrylsa, múldem júre almaı qalatynyn oıladym. Adamdar jatqan jerden men birinshi bolyp atyp turdym. Sol kezde psıhologym “Myna adamdardan buryn sen birinshi jetistikke jetesiń” dedi. Sodan keıin qalpyma keldim. Jeńgem de basý aıtyp, “Kóziniń tirisinde búkil sharýashylyǵyn rettep ketti. Aıaq astynan ketse, maldy da, sharýashylyqty da retteı almaýshy edim” dedi. Terapııadan keıin jaqsara tústim”, – dedi Quralaı hanym.