تاەكۆوندودان باس باپكەر جالعان قۇجات جاساپ, جاسوسپىرىمدەر جارىسىنا قاتىسقان: مينيسترلىك ونى جاۋاپقا تارتپاعان

فوتو: سكرين اقىرىس سەيىتقازى پودكاستىنان

جەلىدە تاەكۆوندودان ۇلتتىق قۇرامانىڭ باس باپكەرى ەسبول سۇلتان 21 جاسىندا جالعان قۇجات جاساپ, جاسوسپىرىمدەر اراسىنداعى جارىسقا قاتىستى دەگەن اقپارات تارادى. سول كەزدە 17 جاسقا دەيىنگى جاسوسپىرىمدەر اراسىنداعى جارىسقا قاتىسقان سپورتشى التىن مەدال جەڭىپ العان, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

اتالعان جاعدايدى جۋرناليست دياس نۇراقىن Facebook الەۋمەتتىك جەلىسىندەگى پاراقشاسىندا جازدى. ونىڭ سوزىنشە, تاەكۆوندودان ۇلتتىق قۇرامانىڭ باس باپكەرى 2001 جىلى ازيا چەمپيوناتىنا ەسبول ەردەن دەگەن اتپەن قاتىسقان.

«ول ازيا چەمپيوناتىنا 2001 جىلى ەسبول ەردەن دەگەن ەسىممەن قاتىسقان. سونداي-اق جۇلدەلى ءبىرىنشى ورىن العان. الايدا ونىڭ جاسى سول كەزدە 21-دە بولعان دەيدى. 1981 جىلى تۋعانىمەن, قۇجاتقا 1984 جىلعى دەپ جازدىرعان ەكەن. وسى قۇجاتپەن 2005 جىلعا دەيىن ءارتۇرلى جارىستارعا قاتىسىپ, جۇلدەگەر اتانعان. ينتەرنەتتەگى اشىق مالىمەتتەردە ەسبول سۇلتاننىڭ 2002 جىلى ازيا ويىندارىندا قولا جۇلدە جەڭىپ العانى جازىلعان. سونداي-اق تاعى بىرنەشە بەدەلدى جارىستاردا جۇلدە الىپتى. تەك 2006 جىلدان باستاپ قايتادان ءوزىنىڭ تۇپنۇسقا تولقۇجاتىن پايدالانعان», – دەپ جازدى جۋرناليست.

ءۋرناليستىڭ مالىمەتىنشە, پوليتسيا جالعان قۇجاتتى تەكسەرگەنىمەن, 25 جىل بۇرىنڭى وقيعا دەپ ءىستى جابا سالعان.

«جالعان قۇجات جاساتقانىن پوليتسيا تەكسەرگەن. ولاردىڭ مالىمەتىنشە, ەسبول ەردەن ۇلىنا 1997 جىلى شىمكەنت قالالىق احاج ءبولىمى تولقۇجات بەرگەن. سوسىن 2000 جىلى وقو, قازىعۇرت اۋدانى احاج ءبولىمى بەرگەن جالعان تۋ تۋرالى كۋالىك نەگىزىندە تاعى ءبىر تولقۇجات جاسالعان. وندا تۋعان جىلىن 1984 جىل دەپ كورسەتكەن. مۇنىڭ ءبارىن قۇزىرلى ورگان وكىلدەرى دالەلدەگەنىمەن, 25 جىل بۇرىن جاسالعان زاڭسىزدىق (قىلمىس) دەپ ءىستى جىلى جابا سالىپتى», – دەيدى جۋرناليست.

اتالعان جاعدايعا قاتىستى Stan.kz ءتىلشىسى تۋريزم جانە سپورت مينيسترلىگىنەن ءمان-جايدى سۇراپ ءبىلدى.

تۋريزم مينيسترلىگىنىڭ مالىمەتىنشە, ەسبول سۇلتانوۆ باس باپكەر لاۋازىمىنا قويىلاتىن بارلىق تالاپقا تولىقتاي سايكەس كەلەدى.

«ەسبول سۇلتانوۆ ەل كونستيتۋتسياسى مەن زاڭدارىن بىلەدى جانە ەڭبەك قاۋىپسىزدىگى مەن ەڭبەكتى قورعاۋ تالاپتارىنا تولىقتاي سايكەس كەلەدى. ونىڭ «دەنە شىنىقتىرۋ جانە سپورت» ماماندىعى بويىنشا جوعارى ءبىلىمى, جاتتىقتىرۋشىعا ارنالعان اتتەستاتى جانە دەنە شىنىقتىرۋ مەن سپورت سالاسىندا كەمىندە 5 جىلدىق ەڭبەك ءوتىلى بار. ەسبول ەردەن ۇلىنىڭ سپورتشى رەتىندە سپورتتىق مانسابىنان ايتارلىقتاي كوپ ۋاقىت ءوتتى. ال ونىڭ سول كەزدەگى ناتيجەلەرىنە باپكەرى جاۋاپتى بولعان. دەگەنمەن بۇل جاعداي ەسبول ەردەن ۇلىنىڭ كاسىبي ءبىلىمى مەن قابىلەتىنىڭ جەتكىلىكتى ەكەنىن جوققا شىعارمايدى. بۇل ونىڭ قازىرگى قىزمەتىنە لايىق كانديدات ەكەنىن دالەلدەيدى», – دەلىنگەن حابارلامادا.

سونداي-اق مينيسترلىك قولدانىستاعى حالىقارالىق ەرەجەلەردە جالعان قۇجاتپەن سپورتتىق جارىستارعا قاتىسقانى ءۇشىن جاۋاپكەرشىلىك كوزدەلمەگەنىن جەتكىزدى.

ەسبول سۇلتانوۆ تۋرالى نە بەلگىلى?

سۇلتانوۆ ەسبول ەردەن ۇلى 1984 جىلى 1 ناۋرىزدا دۇنيەگە كەلگەن. ول سپورتشى رەتىندە تاەكۆوندودان قازاقستاننىڭ جاستار, كەيىن ەرەسەكتەر قۇراماسىندا ونەر كورسەتكەن.

2000 جىلى يرلانديانىڭ كيللارني قالاسىندا وتكەن جاستار اراسىنداعى الەم چەمپيوناتىندا, 68 كەلى سالماق دارەجەسىندە شيرەك فينالعا دەيىن جەتكەن.

ال 2001 جىلى تايۆاننىڭ چجانحۋا قالاسىندا وتكەن جاستار اراسىنداعى ازيا چەمپيوناتىندا التىن مەدال جەڭىپ العان.

2002 جىلى پۋساندا (وڭتۇستىك كورەيا) وتكەن ازيا ويىندارىندا ول 72 كەلىگە دەيىنگى جەڭىل سالماقتا باق سىنادى. قازاقستاندىق تاەكۆوندوشى جارتىلاي فينالعا دەيىن جەتتى. ول الەم چەمپيونى, يراندىق سپورتشى حادي ساەيگە جول بەرىپ, قولا جۇلدەنى ەنشىلەدى.

ارادا ەكى جىل وتكەن سوڭ ەسبول تاەكۆوندودان ءىرى حالىقارالىق جارىستاردا تاعى ەكى مەدال جەڭىپ العان. ول German Open حالىقارالىق ءتۋرنيرىنىڭ كۇمىس جۇلدەگەرى, وڭتۇستىك كورەيانىڭ سوننام قالاسىندا وتكەن ازيا چەمپيوناتىنىڭ قولا جۇلدەگەرى اتانعان.

حالىقارالىق دارەجەدەگى سپورت شەبەرى ەسبول سۇلتانوۆ سپورتتىق مانسابىن 2008 جىلى اياقتاپ, باپكەرلىك قىزمەتكە اۋىسادى. ول ەڭبەك جولىن الماتىداعى «شاڭىراق» سپورت ينتەرناتىندا كومەكشى رەتىندە باستاعان. باپكەرلەر كادەتتەر مەن جاسوسپىرىمدەر اراسىندا ەل چەمپيوناتتارىنىڭ بەس جەڭىمپازىن, ازيا چەمپيوندارىنىڭ جەڭىمپازدارى مەن جۇلدەگەرلەرىن تاربيەلەگەن.

2014 جىلدان 2020 جىلعا دەيىن ەسبول ەردەن ۇلى الماتى قالاسى ەرەسەكتەر قۇراماسىن باسقارعان. ونىڭ جەتەكشىلىگىمەن الماتىلىقتار رەسپۋبليكالىق جارىستاردا مەدالدار سانى بويىنشا كوش باستاپ, ءۇش رەت كونفەدەراتسيا كۋبوگىن جەڭىپ العان.

سۇلتانوۆ كادەتتەر (12–14 جاس) قۇراماسىنىڭ باپكەرى رەتىندە دە تابىستى جۇمىس ىستەدى. ونىڭ جەتەكشىلىگىمەن ءۇش جاس قازاقستاندىق الەم چەمپيوناتىنىڭ التىن جۇلدەگەرلەرى اتاندى. بىرنەشە سپورتشى ازيا چەمپيوناتىندا توپ جاردى.

ەسبول سۇلتانوۆ 2023 جىلدىڭ قىركۇيەگىندە تۋنيس مەملەكەتىنىڭ شاقىرۋىمەن باس باپكەرلىككە باردى. 2024 جىلى وتكەن پاريج وليمپياداسىندا ونىڭ قوس شاكىرتى جۇلدەلى بولىپ, ءبىرى – قولا, ەكىنشىسى – التىن مەدال الدى. وسىلايشا دۇنيەجۇزىلىك تاەكۆوندو فەدەراتسياسى ەسبول سۇلتانوۆتى 2024 جىلدىڭ «ۇزدىك باپكەرى» دەپ تانىدى.

وسىدان كەيىن پرەزيدەنت توقاەۆ سۇلتانوۆتىڭ جەتىستىكتەرىن اتاپ ءوتىپ, باپكەرلەرگە جان-جاقتى قولداۋ كورسەتۋ شارالارىن قولعا الۋ كەرەگىن ايتتى.

بيىل قاڭتار ايىندا ەسبول ەردەن ۇلى تاەكۆوندودان قازاقستان ۇلتتىق قۇراماسىنىڭ باس باپكەرى لاۋازىمىنا تاعايىندالدى.