تاعى ءبىر تانىمال اكتەر دۇنيەدەن ءوتتى

فوتو: teatr.musrepov/posts

بەلگىلى اكتەر, «قۇرمەت» وردەنىنىڭ يەگەرى ءۇسىپحان سەيتىمبەت دۇنيەدەن وزدى. بۇل قايعىلى حاباردى مۇحتار اۋەزوۆ اتىنداعى قازاق ۇلتتىق دراما تەاترىنىڭ ءباسپاسوز قىزمەتى تاراتتى, دەپ حابارلايدى qandastar.kz

«ءۇسىپحان سەيتىمبەت سانالى عۇمىرىن مۇحتار اۋەزوۆ اتىنداعى قازاق ۇلتتىق دراما تەاترىنا ارناپ, تۋما تالانتى, تابيعي دارىنى ارقاسىندا ءار جانردا ەستە قالارلىق سان قىرلى وبرازدار گالەرەياسىن جاسادى. حالىق جادىندا بويىنا بارلىق ونەردى قابىستىرا بىلگەن شەبەر اكتەر رەتىندە قالدى», – دەلىنگەن حابارلامادا.

ءۇسىپحان ابدىكەرىم ۇلى سەيتىمبەت 1960 جىلى بۇرىنعى وڭۇتۇستىك قازاقستان وبلىسى كەلەس اۋدانى يگىلىك اۋىلىندا دۇنيەگە كەلگەن.

1979 جىلى رەسپۋبليكالىق ەسترادا-ونەر ستۋدياسىن ءبىتىرىپ, الماتى وبلىستىق فيلارمونياسىنا جۇمىسقا قابىلداندى.

1983 جىلى تەمىربەك جۇرگەنوۆ اتىنداعى تەاتر جانە كوركەمسۋرەت ينستيتۋتىنا وقۋعا ءتۇستى.

جەلتوقسان وقيعاسى كەزىندە باتىرلىق پەن پاتريوتيزم ۇلگىسىن كورسەتىپ, جاستار قارسىلىعىن ۇيىمداستىرعانى ءۇشىن 1987 جىلى ەكى جىلعا سوتتالىپ, 1989 جىلى بوستاندىققا شىقتى. وسى جىلى ينستيتۋتتاعى وقۋىن قايتا جالعاستىرىپ, ءتامامدادى.

1990 جىلى عابيت مۇسىرەپوۆ اتىنداعى جاسوسپىرىمدەر مەن بالالار تەاترىنىڭ اكتەرلىك قۇرامىنا جۇمىسقا قابىلداندى.

1999 جىلدان بەرى مۇحتار اۋەزوۆ اتىنداعى قازاق ۇلتتىق دراما تەاترىندا اكتەر بولىپ قىزمەت اتقاردى.