تاعى دا كوروناۆيرۋس: اقش اۋەجايلارىندا جاڭا شتامم تارالىپ جاتىر

اقش-تىڭ اۋەجايلارىندا كوروناۆيرۋستىڭ NB.1.8.1 اتتى جاڭا شتامى تارالىپ جاتىر, دەپ حابارلايدى Qandastar.kz اقپاراتتىق پورتالى BAQ.KZ سايتىنا سىلتەمە جاساپ.

Hindustantimes.com تاراتقان مالىمەتكە سايكەس, جاڭا شتامم كاليفورنيا, ۆاشينگتون, ۆيردجينيا جانە نيۋ-يورك اۋەجايلارىندا تابىلعان.

NB.1.8.1 دەگەن اتاۋمەن بەلگىلى COVID-19-دىڭ جاڭا نۇسقاسى ەلدىڭ اۋەجايلارىنا كەلگەن شەتەلدىك ساياحاتشىلاردىڭ باسىم بولىگىنەن انىقتالعانى ايتىلدى.

سDC (اۋرۋلاردى باقىلاۋ مەن الدىن الۋ ورتالىعى) اتالعان شتامم قىتايدا جانە ازيانىڭ كەيبىر بولىكتەرىندە جىلدام تارالىپ جاتقانىن مالىمدەدى.

ىندەتتىڭ بۇل ءتۇرىن جۇقتىرعان ادامدار جاپونيا, وڭتۇستىك كورەيا, فرانتسيا جانە قىتاي سىندى ەلدەردەن ساياحاتتان ورالعان. ۆيرۋسقا سىناما 22 ءساۋىر مەن 12 مامىر ارالىعىندا الىنعانىنا نازار اۋدارىلدى.

اقش-تىڭ وگايو, رود-ايلەند جانە گاۆاي سىندى كەيبىر شتاتتارىندا دا ۆيرۋس جۇقتىرۋ جاعدايلارى بايقالعان.

دەنساۋلىق ساقتاۋ سالاسىنىڭ ساراپشىلارى جاڭا نۇسقانى ءجىتى باقىلاۋدا ۇستاپ وتىرعاندارىن جەتكىزدى.

ماسەلەن, گونكونگتە دە COVID جىلدام تارالىپ, اۋرۋحانا توسەكتەرى ەمگە مۇقتاج ناۋقاستارعا تولعان. تۇرعىندارعا ماسكا كيۋ رەجيمىن ساقتاۋ ۇسىنىلدى.

تايۆاندا دا ىندەت بەلەڭ الىپ بارادى. ولار ەمدەۋ ادىستەرىن جەتىلدىرىپ, ۆاكتسيناتسيالاۋدى قايتا جانداندىردى.