تاكسي جۇرگىزۋشىلەرىنە 50 شاقىرىمنان ارتىق جۇرۋگە تىيىم: قاجەتتىلىك الدە ءماجبۇرلى شارا?

يلليۋستراتسيا tengrinews

شىلدە ايىنىڭ اياعىندا كولىك مينيسترلىگى تاكسي ساپارلارىن 50 شاقىرىمعا دەيىن شەكتەۋدى ۇسىندى. قوعامدا بۇل ماسەلە ءجىتى تالقىلانىپ جاتىر, دەپ حابارلايدى qandastar.kz inbusiness.kz سايتىنا سىلتەمە جاساپ.

كولىك ءمينيسترى مارات قاراباەۆ ءرولى ون جاعىنداعى كولىكتى InDrive-قا تىركەۋدى الىپ تاستاۋ ماسەلەسى قارالاتىنىنىن, بۇل باعىتتا بىرقاتار ۇسىنىس ازىرلەنگەنىن ايتتى. سوزىنشە, ەلىمىزدە جول-كولىك وقيعالارىنىڭ دەنى وڭ ءرۋلدى كولىكتەردىڭ قاتىسۋىمەن بولادى.

بۇگىنگى تاڭدا سەناتتا «ورتاشا جىلدامدىق» تۋرالى زاڭ قارالىپ جاتىر.

ء«بىر نۇكتەدەن ەكىنشى نۇكتەگە جەتۋ ءۇشىن ورتاشا جىلدامدىقتى اسىرماۋ كەرەك, ودان كوپ بولسا, اۆتوماتتى تۇردە ايىپپۇل كەلەدى. ناتيجەسىندە جەڭىل كولىك پەن اۆتوبۋستارداعى ورتاشا جىلدامدىق بىردەي بولادى دەپ ويلاپ وتىرمىز. سوندىقتان حالىق قايتا اۆتوبۋسقا وتە مە دەگەن وي بار. ەكىنشى ۇسىنىس – باسقا ەلدەردە InDrive سياقتى اگرەگاتتاردىڭ قالالاردىڭ اراسىندا قاتىناۋعا رۇقساتى جوق. مىسالى, بىزدە دە 50 شاقىرىمعا دەيىن بولادى, ودان ءارى قاتىناۋعا بولمايدى دەگەندەي», – دەدى مينيستر ۇكىمەت وتىرىسىنان كەيىنگى بريفينگتە.

ۆەدومستۆو باسشىسى جول اپاتىنىڭ دەنى جىلدامدىقتى قاتتى اسىرعاننان, جۇرگىزۋشىلەردىڭ كۇنى-ءتۇنى دەمالماي ءبىر قالادان ەكىنشى قالاعا جولعا شىعۋىنان دەپ وتىر. ارينە, ءمينيستردىڭ ايتىپ وتىرعانى ازىرگە تەك ۇسىنىستار ەكەنىن ەسكەرۋىمىز كەرەك.

تاۋەلسىز اۆتوموبيل وداعىنىڭ توراعاسى ەدۋارد ەدوكوۆتان كولىك مينيسترلىگىنىڭ باستاماسىنا قاتىستى پىكىرىن بىلدىك.

«بۇگىندە نارىقتا وسىنداي قىزمەت تۇرىنە (تاكسي – رەد.) سۇرانىس, بۇل قىزمەتتى ۇسىناتىن جەتكىزۋشى بار. بۇل ماعان باعاسى بويىنشا كەلىسۋگە كومەكتەسەتىن جاي عانا قوسىمشا. تاكسي جۇرگىزۋشىلەرىنىڭ قاۋىپسىزدىك تالاپتارىنا سايكەستىگى بۇل باسقا ماسەلە. بۇل ويلانۋدى قاجەت ەتەدى. جالپى العاندا, ەگەر دە قانداي دا ءبىر زاڭنامالىق توسقاۋىلدار بولماسا, وندا ەركىن نارىقتا تىيىم سالۋعا قاتىستى وسىنداي باستامالار كىشكەنە تۇسىنىكسىزدەۋ», – دەدى سپيكەر.

ساراپشىعا InDrive قوسىمشاسىندا تاكسي جۇرگىزۋشىسى رەتىندە ەكىنىڭ ءبىرى تىركەلە الاتىنىن, بۇل ماسەلەدە نەگە باسا ءمان بەرۋ قاجەت ەكەنىن انىقتادىق.

«بۇل سۇراق ءجىتى باقىلاۋدى قاجەت ەتەدى. سەبەبى كەز كەلگەن ادامنىڭ تىركەلۋىنە جول بەرمەۋ كەرەك. مۇندا ءبىرىنشى كەزەكتە كولىك ءتيىستى تەحنيكالىق جاعدايدا بولۋى قاجەت. بۇل تاكسي جۇرگىزۋشىسى تەحنيكالىق بايقاۋدان وتكەن ماشينانى ۇسىنۋى قاجەت دەگەن ءسوز. ەكىنشىسى – جۇرگىزۋشىنىڭ بىلىكتىلىگى. ياعني ونىڭ بەلگىلى ءبىر ءوتىلى بولۋى كەرەك», – دەپ جالعاستىردى ول.

ەدۋارد ەدوكوۆ قوسىمشادا جۇرگىزۋشىلەردىڭ ءبىر تاۋلىكتە قابىلدايتىن تاپسىرىستارىنىڭ سانى بويىنشا شەكتەۋ بولۋى ءتيىس دەگەن پىكىردە.

ء«بىز يندرايۆەردە, ياندەكستە بولسىن, كولىككە وتىرعاندا جۇرگىزۋشى ۇيىقتاعان با, كۇنى-ءتۇنى دەمالماعان با, سالدارىنان كولىك تىزگىنىندە ۇيىقتاپ قالماي ما – ونى بىلمەيمىز. تاكسي جۇرگىزۋشىلەرى قولداناتىن قوسىمشادا بەلگىلى ءبىر ساعاتتان ارتىق تاپسىرىس كولەمىن قابىلداۋعا بولمايتىنى جونىندە بەلگىلەنگەن ءجون», – دەدى ساراپشى.

تاۋەلسىز اۆتوموبيل وداعىنىڭ توراعاسى جولداعى قاۋىپسىزدىكتى ارتتىرۋعا جاياۋ جۇرگىنشىلەر دە, جۇرگىزۋشىلەر دە, پوليتسيا دا جاۋاپتى ەكەنىن ايتادى.

«ەگەر دە جاياۋ جۇرگىنشىلەر مەن جۇرگىزۋشىلەر جول قوزعالىسى ەرەجەلەرىن ساقتايتىن بولسا, وندا جولدا ءجۇرۋ سوعۇرلىم قاۋىپسىز بولا تۇسەدى. ەكىنشىسى – پروفيلاكتيكالىق شارالار. بۇل باعىتتا پوليتسيا تاراپىنان باقىلاۋ مەن ءتۇسىندىرۋ جۇمىستارى كۇشەيگەنى ءجون. كەلەسى ماسەلە – ينفراقۇرىلىمنىڭ دۇرىس بولۋى», – دەدى ەدۋارد ەدوكوۆ.

ەندى جۇرگىزۋشىلەرگە قانداي تالاپ قويىلۋى مۇمكىن?

تاكسوموتورلىق تاسىمالداردا قاۋىپسىزدىكتى قامتاماسىز ەتۋ ءۇشىن بىرقاتار وزگەرىستەر ەنۋى مۇمكىن. ماسەلەن, جۇرگىزۋشى جولعا شىعار الدىندا مەديتسينالىق كۋالاندىرۋدان ءوتۋى كەرەك, ەڭبەك جانە دەمالىس كەستەسىن جانە جىلدامدىق رەجيمىن ساقتاۋى ءتيىس. سونداي-اق تاكسوموتورلىق تاسىمالدارعا تارتىلعان اۆتوكولىك مىندەتتى تۇردە قازاقستاندا تىركەلىپ, جىلىنا ەكى رەت تەحنيكالىق بايقاۋدان ءوتۋى ءتيىس. بۇل تۋرالى كولىك ءمينيسترى مارات قاراباەۆ پەن inDrive نەگىزىن قالاۋشى ارسەن تومسكيدىڭ كەزدەسۋى ناتيجەسىندە بەلگىلى بولدى.