جاڭالىقتار
تاكسيستەر شىعىنعا باتۋى مۇمكىن – دەپۋتات سارسەنعاليەۆ ماجىلىستە دابىل قاقتى
فوتو: ءماجىلىس
ءماجىلىس دەپۋتاتى نارتاي سارسەنعاليەۆ تاكسي جۇرگىزۋشىلەرىنىڭ ماسەلەسىن كوتەردى, دەپ حابارلايدى qandastar.kz Dalanews.kz-كە سىلتەمە جاساپ.
ءماجىلىس دەپۋتاتى نارتاي سارسەنعاليەۆ پرەمەر-ءمينيستردىڭ ءبىرىنشى ورىنباسارى رومان سكليارعا تاكسي جانە اۆتوبۋس جۇرگىزۋشىلەرىنىڭ ماسەلەسىن كوتەرىپ, ۇكىمەتتىڭ جاڭا باستاماسىن سىنعا الدى.
“ۇكىمەت تاكسي مەن اۆتوبۋس جۇرگىزۋشىلەرىن تارتىپكە كەلتىرۋ ماقساتىندا جاڭا زاڭ جوباسىن ۇسىندى. بۇل قۇجاتتا جولاۋشىلار تاسىمالى سالاسىنداعى مەملەكەتتىك قۇزىرەتتىڭ ءبىر بولىگىن ءوزىن-ءوزى رەتتەۋ ۇيىمدارىنا (سرو) بەرۋ كوزدەلگەن”, – دەدى دەپۋتات.
“تاريف بەلگىلەۋ مەن باعا رەتتەۋدى جەكەمەنشىك ۇيىمعا بەرۋ – ۇلكەن قاتەلىك”
سارسەنعاليەۆتىڭ ايتۋىنشا, زاڭ جوباسى ءوزىن-ءوزى رەتتەۋ ۇيىمدارىنا (سرو) جولاۋشىلار تاسىمالىنداعى تاريفتەردى بەلگىلەۋ جانە باعانى رەتتەۋ قۇزىرەتىن بەرمەك. دەپۋتات مۇنى “ۇلكەن قاتەلىك” دەپ سانايدى.
“قۇرىلۋى مۇمكىن ءوزىن-ءوزى رەتتەۋ ۇيىمدارىنىڭ ازاماتتاردى ايامايتىنى بەلگىلى. بۇل تۇتاس سالانى جەكەمەنشىك ۇيىمداردىڭ قولىنا وتكىزىپ, قولدان مونوپوليا جاساۋعا باعىتتالعان قيسىنسىز ارەكەت. بۇعان الەمدىك مىسالدار بار. ماسەلەن, اقش-تىڭ كاليفورنيا شتاتىندا تاكسي قىزمەتى ءوزىن-ءوزى رەتتەۋ ۇيىمدارىنا بەرىلگەننەن كەيىن, ولار تەك وزدەرىنە جاقىن تاكسي كومپانيالارىن تىركەپ, قالعاندارىنا جۇمىس ىستەۋگە مۇمكىندىك بەرمەدى. سونىمەن قاتار, قاۋىپسىزدىك تالاپتارى جەڭىلدەتىلگەندىكتەن, تاكسي جۇرگىزۋشىلەرى دەمالىسسىز جۇمىس ىستەۋگە ءماجبۇر بولدى. سالدارىنان تاكسي قاتىسقان جول اپاتتارىنىڭ سانى 15%-عا ارتتى. بۇل – ءوزىن-ءوزى رەتتەۋ جۇيەسىن ەنگىزۋدىڭ ناقتى سالدارى”, – دەدى دەپۋتات.
“جول قاۋىپسىزدىگىن جەكەمەنشىك ۇيىمدارعا تاپسىرۋ – ادامداردىڭ ومىرىنە سالعىرت قاراۋ”
سارسەنعاليەۆ بۇل جۇيەنى ەنگىزۋگە ساراپشىلار دا, ءماجىلىس دەپۋتاتتارى دا قارسى بولعانىن اتاپ ءوتتى. دەگەنمەن, مەملەكەتتىك ورگاندار جولداعى قاۋىپسىزدىكتى وزدەرى قامتاماسىز ەتە الماي وتىرىپ, جاۋاپكەرشىلىكتى جەكەمەنشىك ۇيىمدارعا ىسىرا سالۋعا تىرىسۋدا.
“برازيليادا جولاۋشىلار تاسىمالى ءوزىن-ءوزى رەتتەۋ ۇيىمدارىنا بەرىلگەننەن كەيىن, ولار ليتسەنزيالاۋ تالاپتارىن جەڭىلدەتتى. سونىڭ سالدارىنان اۆتوبۋستار قاتىسقان جول اپاتتارىنىڭ سانى 15%-عا ءوسىپ, زارداپ شەككەندەر سانى ارتتى. بۇل بىزگە ساباق بولۋى كەرەك.”
“قازاقستاندا جول اپاتتارى جىل سايىن جۇزدەگەن ادامنىڭ ءومىرىن جالمايدى. وسىنداي جاعدايدا, جول قاۋىپسىزدىگىن قامتاماسىز ەتۋ جاۋاپكەرشىلىگىن ءوزىن-ءوزى رەتتەۋ ۇيىمدارىنا تاپسىرۋ – اقىلعا قونىمسىز شەشىم.”
“تاكسيستەردى قوسىمشا جارنا تولەۋگە ماجبۇرلەۋ – حالىققا اۋىر تيەدى”
سارسەنعاليەۆتىڭ ايتۋىنشا, ۇكىمەت جاڭا زاڭ جوباسى ارقىلى ءاربىر تاكسي جۇرگىزۋشىسىن ءوزىن-ءوزى رەتتەۋ ۇيىمىنا مۇشەلىككە كىرگىزىپ, جارنا تولەۋگە مىندەتتەمەك.
“دەپۋتاتتار بۇل نورمانى سىنعا العاندا, مينيسترلىك “تاكسي قىزمەتىمەن اينالىساتىن ءموبيلدى قوسىمشالارعا تىركەلگەن جەكە كاسىپكەرلەر عانا جارنا تولەيدى” دەپ سەندىردى. بىراق مىندەتتى تولەمدەر ەنگىزىلسە, بۇل جولاۋشى تاسىمالى قىزمەتىنىڭ قىمباتتاۋىنا اكەلەدى, ونىڭ سالدارىنان قاراپايىم حالىق زارداپ شەگەدى.”
“تاكسي جانە اۆتوبۋس تاسىمالى سالاسىنا ءوزىن-ءوزى رەتتەۋ ۇيىمىن ەنگىزۋ – تۇتاس سالانى بەلگىلى ءبىر توپتىڭ قولىنا وتكىزىپ, مونوپوليا جاساۋعا اپاراتىن تىكەلەي جول. سوندىقتان ءبىز, “امانات” فراكتسياسىنىڭ ءبىر توپ دەپۋتاتى, بۇل قيسىنسىز شەشىمدى توقتاتۋ ءۇشىن زاڭعا ناقتى وزگەرىستەر ەنگىزدىك. بارلىق ارىپتەستەرىمىزدى جانە ۇكىمەت وكىلدەرىن وسى تۇزەتۋلەردى قولداۋعا شاقىرامىن.”
دەپۋتات سونىمەن قاتار مينيسترلىكتىڭ كولىكتى 5 مينۋتتان ارتىق وتالدىرىپ قويۋعا تىيىم سالۋ تۋرالى شەشىمىن قايتا قاراۋدى تالاپ ەتتى.
