«تالانتتى باپكەرلەر ءوز ەلىمىزدەن قولداۋ تاپپاي, شەتەل اسىپ جاتىر»: پرەزيدەنت سپورت سالاسىندا جەمقورلىق فاكتىلەرى تۋرالى ايتتى

فوتو: اشىق دەرەككوز

پرەزيدەنت بۇگىندە ءار ءوڭىر قانداي سپورتتى قولدايتىنى تۋرالى شەشىمدى ءوز بەتىنشە قابىلدايتىنىن سىنعا الدى. ۇكىمەتكە جاعدايدى باقىلاۋعا الىپ, سپورتقا قاتىستى مەكەمەلەردىڭ بارلىق دەڭگەيىندەگى باسقارۋ ۆەرتيكالىن قالپىنا كەلتىرۋ جونىندە تاپسىرما بەردى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

مەملەكەت باسشىسىنىڭ ايتۋىنشا, سوڭعى بەس جىلدا جوعارى جەتىستىكتەر سپورتىنا شىعىن ەكى ەسە وسكەن, بىراق سوعان لايىق ناتيجە جوق.

«سالالىق مينيسترلىك, ۇلتتىق وليمپيادا كوميتەتى, وڭىرلەردەگى سپورت باسقارمالارى مەن فەدەراتسيالاردىڭ جۇمىسىندا ولقىلىق كوپ دەپ سانايمىن. قازىرگى جاعدايعا قاراعاندا, سپورت فۋنكتسيونەرلەرى سالانى دامىتۋمەن ەمەس, ميللياردتاعان بيۋدجەت قارجىسىن يگەرۋمەن الەك. ولار تۇپكى ناتيجەگە باس اۋىرتپايدى. سپورت سالاسىندا جەمقورلىق فاكتىلەرى ءجيى كەزدەسەدى. مۇندايعا جول بەرۋگە بولمايدى!» – دەدى توقاەۆ.

پرەزيدەنت ءار ءوڭىر قانداي سپورتتى قولدايتىنى تۋرالى شەشىمدى ءوز بەتىنشە قابىلدايتىنىن سىنعا الدى.

سونىمەن قاتار ول سپورت سالاسىنا جوعارى بىلىكتى مامانداردى تارتۋ ءۇشىن قولايلى جاعداي جاساۋ كەرەك ەكەنىن ايتتى.

«ولار باسقا ەلگە بارىپ, جاس سپورتشىلاردى تاربيەلەيدى. باسقا مەملەكەتتىڭ ۇلتتىق قۇراما كوماندالارىن الەمدىك دودالارعا دايىندايدى. مىسالى, وسى وليمپيادا ويىندارىندا تۋنيس ەلىنىڭ تحەكۆوندودان ۇلتتىق قۇراماسى قازاق باپكەرى ەسبول سۇلتانوۆتىڭ جەتەكشىلىگىمەن ەكى مەدال جەڭىپ الدى, ونىڭ بىرەۋى – التىن مەدال. باپكەرلەرگە جان-جاقتى قولداۋ كورسەتۋ شارالارىن قولعا الۋ كەرەك.  مىقتى باپكەرلەر مەكتەبىن جاساقتاۋ قاجەت», – دەدى توقاەۆ.

ەسكە سالايىق, بۇعان دەيىن قاسىم-جومارتتوقاەۆ وليمپيادا ويىندارىنىڭ جۇلدەگەرلەرىمەن كەزدەسكەنى تۋرالى حابارلاعان ەدىك.