تالاپكەرلەرگە گرانتقا ءتۇسۋدىڭ تاعى ءبىر جولى بەلگىلى بولدى

فوتو: ©️ Tengrinews.kz / تۋرار كازانگاپوۆ

اكىمدىكتەر تالاپكەرلەرگە 2,5 مىڭعا جۋىق گرانت ءبولدى, – دەپ حابارلايدى Massaget.kz ءتىلشىسى عىلىم جانە جوعارى ءبىلىم مينيسترلىگىنە سىلتەمە جاساپ.

2024-2025 وقۋ جىلىنا جەرگىلىكتى اتقارۋشى ورگانداردان كونكۋرستىق نەگىزدە مەملەكەتتىك ءبىلىم بەرۋ گرانتىنا وتىنىشتەردى قابىلداۋ باستالدى. اكىمدىكتەر جىل سايىن باسىم ماماندىقتار بويىنشا نىسانالى دايارلىققا گرانتتار بولەدى.

بيىل جەرگىلىكتى اتقارۋشى ورگاندار 2475 ءبىلىم بەرۋ گرانتتارىن ءبولدى.

ءبىلىم بەرۋ گرانتىن تاعايىنداۋ كونكۋرسىنا قاتىسۋ ءۇشىن ۇمىتكەر جوعارى وقۋ ورىندارىنىڭ قابىلداۋ كوميسسياسىنا ءوتىنىش بەرۋ قاجەت. سونداي-اق جوو-عا ءبىلىمى تۋرالى قۇجات, ۇبت سەرتيفيكاتىن, جەكە باسىن كۋالاندىراتىن قۇجاتتىڭ كوشىرمەسىن, جەڭىلدىك ساناتىن راستايتىن قۇجاتتاردى (بار بولعان جاعدايدا) تاپسىرادى.

قۇجاتتاردى قابىلداۋ مەرزىمى تۋرالى اقپاراتتى اكىمدىكتەردەن, سونداي-اق جوعارى وقۋ ورىندارىنىڭ قابىلداۋ كوميسسيالارىنان الۋعا بولادى. گرانت بەرۋ تۋرالى شەشىمدى اكىمدىك جانىنان قۇرىلعان ارنايى كوميسسيا قابىلدايدى. جوعارى وقۋ ورىندارىنا قابىلداۋ 25 تامىزدا اياقتالادى.