Talapkerlerge grantqa túsýdiń taǵy bir joly belgili boldy

Foto: ©️ Tengrinews.kz / Týrar Kazangapov

Ákimdikter talapkerlerge 2,5 myńǵa jýyq grant bóldi, – dep habarlaıdy Massaget.kz tilshisi Ǵylym jáne joǵary bilim mınıstrligine silteme jasap.

2024-2025 oqý jylyna jergilikti atqarýshy organdardan konkýrstyq negizde memlekettik bilim berý grantyna ótinishterdi qabyldaý bastaldy. Ákimdikter jyl saıyn basym mamandyqtar boıynsha nysanaly daıarlyqqa granttar bóledi.

Bıyl jergilikti atqarýshy organdar 2475 bilim berý granttaryn bóldi.

Bilim berý grantyn taǵaıyndaý konkýrsyna qatysý úshin úmitker joǵary oqý oryndarynyń qabyldaý komıssııasyna ótinish berý qajet. Sondaı-aq JOO-ǵa bilimi týraly qujat, UBT sertıfıkatyn, jeke basyn kýálandyratyn qujattyń kóshirmesin, jeńildik sanatyn rastaıtyn qujattardy (bar bolǵan jaǵdaıda) tapsyrady.

Qujattardy qabyldaý merzimi týraly aqparatty ákimdikterden, sondaı-aq joǵary oqý oryndarynyń qabyldaý komıssııalarynan alýǵa bolady. Grant berý týraly sheshimdi ákimdik janynan qurylǵan arnaıy komıssııa qabyldaıdy. Joǵary oqý oryndaryna qabyldaý 25 tamyzda aıaqtalady.